Hinog sa punoan

Gula 9

“Bahala na. Mas mahinungdanon ang kaluwasan sa inyong inahan.”

“Manghuwam lang kaha ta’g kuwarta ni Don Emilio,” sugyot ni Urielle.

Wala motingog si Noy Sidro. Naghinuktok kini sa iyang gisulti.

“Suwayan lang nato, Tay,” gikan ni Urielle. “Nagtuo kong dili mobalibad kanato si Don Emilio.”

“Mauwaw ko ni Don Emilio, Urielle,” ni Noy Sidro pa.

“Unsa may imong kauwawan? Maayo si Don Emilio nato. Total, ato mang bayran ang kuwarta nga atong mahuwaman gikan niya. Mas maayo na lang kanang paagiha, Tay, kay sa imong ibaligya ang atong kabaw. Mas mosamot unya ang atong kalisod sa panginabuhi kun imong idispatsar kanang atong igdadaro.”

Daklit nga naghinuktok si Noy Sidro. Gipasagdan lang kini ni Urielle nga namalandong sa iyang gisulti.

“Kun dili ka, Tay,” namulong si Urielle pagkilab sa pipila ka daklit. “Ako ang makig-atubang ni Don Emilio Arcanghel.”

“U-unsa?” Nakugang ang amahan niya.

“Akoy mangutang ni Don Emilio, Tay. Pasabton ko siya kun nganong nagkinahanglan kita og kuwarta.

“Ako na lang,” daling hukom ni Noy Sidro. “Pabilin ka na lang dinhi. Bantayi ninyo ni Raymond ang inyong inahan.” -- Sumpayan pa