“Aslom man ning manggaha, Nelson,” mingislo ang nawong ni Urielle nga mitan-aw sa hinigugma samtang nagkaon siya sa mangga nga dala niini.
“Di man gud hinog sa punoan,” tubag ni Nelson. “Giahat ko nag pupo kay giatake sa mga kabog. Gipahinog ko na lang pinaagi sa pagtan-og.”
“Mao diay nga aslom bisan hinog na.”
“Sagdi lang. Sa sunod siguradoon ko nga tam-is nga mangga na ang dad-on ko para nimo.”
Wala na motingog si Urielle. Pagkataudtaod, gilain niya ang topic sa ilang panagsulti.
“Wa na ba magsamok si Lindy, nimo?” Nangutana si Urielle.
“Wa na,” tul-id nga tubag ni Nelson. “Gipul-an na gyud siya sa kadugayan.
“Nangangkon man siya nga uyab mo.”
“Mao bitaw nay iyang gipalutaw nga estorya. Gusto lang siya nga maguba ang atong relasyon.”
“In love gyud tingali siya kaayo nimo maong gihimo niya ang tanan aron makuha niya ang imong atensyon.”
“Ambot lang.” -- Sumpayan pa