Call girl

Dugay na g’yud nga panahon nga si Vanessa wala na makabalik sa kinaham niya nga bar nga adto siya sagad magpalabay sa oras – ang Sanciangko’s Wildflower.

Dinhi niining maong bar niya makaila kaniadto si Rommel, ang lalaki nga unang nakapusgay sa iyang pagka virgin. Gikan niadto, wala na gayud mobalik pa si Vanessa sa maong dapit.

Apan tungod sa pagkadisgrasya ni Vanessa sa mga kamot ni Rommel kaniadto, kini maoy nakatukmod kaniya pagsulod sa pangita nga gihulagway sa uban nga salawayon – ang pagka call girl.

Duna siya’y mga bayot nga maoy iyang mga contact kun may mga lalaki nga manginahanglan og kalipay sa usa ka babaye.

Samtang nagkalingaw si Vanessa pagkanta sa kinaham niyang mga awit didto sa Sanciangko’s Wildflower, takulahaw lang mitingog ang message alert sa iyang selpon.

Human og kanta ni Vanessa gitan-aw dayon niya’g kinsa’y nag-text. Si Marian diay nga bayot diha sa Lorega. Mariano g’yud ang tinuod nga ngalan sa maong bayot. “Asa ka Day! Diay Amerkano ug nakagusto cya nimo pagkakita sa imong picture. Kursonada ka niya Day! Pls reply dayon,” nagpahiyom si Vanessa nga nagbasa sa text.

Iya dayong gireplayan si Marian. “Dia ko sa Sanciangko’s Wildflower bayot! Apas mo diri ari ta magsabot.”

Mikanta pag-usab si Vanessa. Namakpak ang mga customers sa bar dihang sundog g’yud niya ang I Can’t Say Goodbye To You nga ang original nga singer mao si Helen Reddy.

Gisunod niya pagkanta ang Torn Between Two Lovers ug sama sa gihapon sundog niya ang tingog sa singer nga si Mary McGregor.

Wala makabantay si Vanessa nga samtang siya nagkanta, diha na sila si Marian ug ang Amerkano sa bar og naminaw sa iyang pagkanta. Gipakpakan sa mga customers si Vanessa human niya’g kanta.

Giduol dayon siya ni Marian. Unya gikihatan ni Marian ang Amerkano nga didto milingkud sa pikas lamesa ug miduol kini sa lamesa ni Vanessa.

“Nichol, she is Vanessa… ug Day mao ni si Nichol nga dia sa Cebu as a tourist,” nagngisi ang bayot nga mipaila-ila sa Amerkano sa call girl.

“Hi, I’m glad to meet you. I admired your beauty when Marian showed to me your picture and I want to have a date with you tonight. Is it possible?” slang kaayo manulti ang Amerkano.

Mipahiyom lang si Vanessa. Miorder ug tulo ka botelya nga beer si Nichol para kanila. Taud-taud, nananghid si Marian nga mobiya na.

“Ikaw na ang mahibalo nako Day. Nichol please take good care of my pretty friend,” matud ni Marian sa dayong biya sa duha. (Sumpayan pa)