Tentasyon

Gula 11

Sa hilom gisakitan si Ritchie nga nagsud-ong sa iyang hinigugma nga giagbayan ni Mr. Morales dihang migawas sila sa usa ka kwarto.

Bisan og may mibathaw na nga kasuko niya kang Mr. Morales, apan mirespitar gihapon siya pagpangayo’g katahuran. Nagtupad sila si Mr. Morales ug si Camel sa paglingkud atbang ni Ritchie.

“Gipatawag ka namo Ritchie tungod kay wala malilong kanamo nga kamo si Camel dunay relasyon,” matud ni Mr. Morales.

“Maayo kay wala malilong kanimo ang among relasyon Sir apan nganong gikuha man nimo nga private secretary si Camel dinhi sa imong balay Sir ug karon nakita ko nga nanggawas kamo gikan sa usa ka kwarto,” ni Ritchie nga daw nagmahay.

Dali nga misagbat si Camel. “Ritchie, dunay panultihon nga ang manok nga nagputak maoy nangitlog. Sama nga ang tawo nga nag-sili mao gayo’y mahangan.”

Gipasagdahan lang ni Mr. Morales si Camel nga makapahungaw sa iyang gibati. “Nganong sa hamubo lang nga panahon nga nagkalagyo kita kadali ra nimo nga nakakita’g laing babaye? Apan walay problema Ritchie kay diha nako masukod ang matuod mo nga pagkatawo,” matud ni Camel.

Mitingog na ang general manager nga si Lea. “Tunog na kaayo sa atong kompaniya Ritchie nga ikaw ang nakapamabdos ni Christy nga akong secretary nga maoy mipuli ni Camel.”

“Mahimong naingon niana ang sitwasyon kay nagtoo g’yud ko nga gituyo ni Mr. Morales nga anhi sa balay idistino si Camel kay may gusto siya sa akong hinigugma ug karon nakita g’yud nako nga nag-uban sila sa kwarto,” ni Ritchie pa.

Nagdungan pagkatawa sila si Mr. Morales ug Camel. Mitindog si Mr. Morales ug giingnan si Ritchie nga motindog kay adto sila magtiwas og estorya sa kwarto uban ni Camel ug Lea.

Pagsulod nila sa pultahan, mao diay kadto ang hamugaway kaayong opisina ni Mr. Morales nga tua usab ang lamesa ni Camel.

Sa usa ka lamesa, dunay ngalan “Camel L. Morales.” Natibuok na gayud ang pagtuo ni Ritchie nga naminyo na diay sila si Camel ug Mr. Morales.

Mibuak sa kahilom si Mr. Morales nga nakasabut ni Ritchie kay mitutok ki ni sa ngalan ni Camel diha sa lamesa. “Ayaw na’g liboga ang imong utok Ritchie. Akong anak kini si Camel mao nga Morales ang iyang apelyedo.”

“Gituyo niya nga wala magdala sa akong apelyedo kay naniid siya kinsa ang mga ligoy sa opisina. Wala unta koy pagsupak sa inyong paghigugmaay, apan gibudhian mo siya Ritchie,” matud ni Mr. Morales.

Misagbat si Camel. “Atubangan ni Papa, akong bugtoon ang atong relasyon. Anaa ra nimo kun mopadayon ka gihapon sa imong pagtrabaho sa among kompaniya.” (Kataposan)