Gula 10
Gikan sa opisina sa general manager, mibalik si Ritchie didto sa iyang lamesa nga gihakup og tumang kasagmuyo.
Wala siya masayud unsay angay niyang buhaton apan dili siya makabalibad pagtambong sa tigum nga gipatawag ni GM Lea adto sa balay ni Mr. Morales.
Mitingog ang message alert sa cellphone ni Ritchie. Nag-text kaniya si Christy bisan og ang dalaga diha ra kini sa dili layo sa iyang nahimutangan. Buot magpakisayud si Christy sa gipanagsultihan nila ni GM Lea.
Gibutang pagbalik ni Ritchie ang cellphone ug wala niya tubaga ang pangutana ni Christy. Human sa taud-taud nga paghuna-huna, nahukman ni Ritchie nga moadto sa balay ni Mr. Morales inigka-gabii.
Apan pabilin may naglimin nga kalibog sa iyang kaisipan niadtong gisulti ni GM Lea kaniya nga kinahanglang motambong g’yud siya sa tigum unyang gabii aron mahibaw-an niya ang kinatibuk-an.
“Unsa kaha’y gipasabut ni Lea sa maong pagkasulti?” naghinuktok si Ritchie samtang nagpasumangil pagtutok sa iyang laptop.
Wala gayud mahanaw sa iyang kaisipan nga tungod sa panagsa na lang nga pag-communicate kaniya ni Camel, may relasyon na gayud kini ug si Mr. Morales.
Gihuna-huna ni Ritchie kun unsay iyang himoon kun magkabuwag gayud sila si Camel. Wala pa siya’y huna-huna nga pakaslan si Christy bisan og mimabdos na kini’g duha ka buwan sa kinawat-kawat nilang kalipay.
Unya kalit lang mipasunding sa iyang kaisipan ang gisulti kaniya kaniadto ni Camel sa matag nila panuroy. Sagad nga litukon ni Camel. “Igasa nako kanimo ang akong kaputli Ritchie sa unang gabii sa atong kasal. Ayaw lang g’yud ko limbongi kay tinuod usab ako nga magmahal kanimo.”
Hapon na. May kaisog na si Ritchie pagduol sa lamesa ni Christy kay unang mibiya si Lea sa iyang opisina human makabilin og pulong kaniya nga dili gayud mosipyat pag-adto sa balay ni Mr. Morales.
“Paadtoon ko ni Lea sa balay ni Mr. Morales. May dinaliang tigum nga gipatawag si GM Lea uban sa iyang amahan. Moadto ko karong taud-taud Christy,” matud ni Ritchie nga may kasubo ang dagway.
Igo lang mitutok kaniya si Christy nga daw mikisdum usab ang panagway.
Didto sa balay ni Mr. Morales, naglingkod na si Ritchie sa sala uban ni GM Lea. Wala pa sila si Mr. Morales ug Camel. Taud-taud, migawas kini gikan sa usa ka lawak, giagbayan ni Mr. Morales si Camel.
Misamot nga nagtoo na g’yud si Ritchie nga may relasyon na si Camel ug ang kanhi nila general manager. (Taposon sunod gula)