Beterano diay sa Iraq war

Sayo nga miabot ang eroplano nga gisakyan ni Emily gikan sa Pilipinas paingon sa Sarasota, Florida. Nagpunsisok ang mga Kano sa may ganghaan sa airport nga mosugat o motagbo sa mga pasahero sa matag eroplano nga motugpa.

Gipalibot ni Emily ang iyang panan-aw ngadto sa pundok sa mga nanugat pamasin nga makit-an niya si Steve nga maoy motagbo kaniya sa iyang pag-abot sa America. Nagbitbit si Emily sa retrato ni Steve nga nagsul-ob military uniform sa US Army, ug mao ra kini ang bugtong paagi nga mailhan niya si Steve. Gikulbaan na siya....!

Taudtaod, may misangpit kaniya nga usa ka Kano nga nagsungkod og brace.

"Hi, are you Emily....?" Matud pa sa nangutana nga Kano.

"Yes, I am Emily from Cebu, Philippines....!" Tubag ni Emily nga giuyog pa sa kakulba ang dughan.

Kalit nga migakus kang Emily ang Kano: "I am Steve, yours truly. How are doing....?" Hugot ang ginaksanay sa duha uban ang mainitong mga halok.

Human sa ilang paghimamat, giagda ni Steve si Emily paingon sa kotse nga nag-parking gawas sa airport. Malipayon kaayo ang panagkita nila...!

Gikuha si Emily ni Steve pinaagi sa Fiancee Visa human sa duha katuig nilang panag-uyab pinaagi sa sulat ug E-mail. Maestra si Emily sa Sugbo samtang si Steve nag-alagad isip sundalo sa Iraq.

Usa ka bulan nang milabay tapus sa ilang kasal, mipadala'g e-mail si Emily sa iyang inahan.

"My husband Steve is a good provider and a responsible man. He has only one foot ... But I love him so much...!" Nagkanayon sa e-mail ni Emily ngadto sa inahan nga sinagolan sa kamingaw nga parayeg.

Mapinanggaon sab ang tubag sa inahan ngadto kang Emily.

"You are so fortunate, anak. your late father has only one and half inch when he married me. Mao nga ikaw ra ang among anak. So, love him as much as you can...!" Pahimangno sa inahan sa iyang e-mail.

Mora'g wa magkasinabot ang anak ug inahan sa ilang e-mail. Ang gipasabot ni Emily sa iyang e-mail ngadto sa iyang inahan mao nga putol ang pikas tiil ni Steve dapit sa tuo. Dili sa ingon nga unsa. Pungkol intawon ang iyang bana. Sa misunod nga mga e-mail, natin-aw na ang tanan ... ug sa hilum mipahiyom lang sa kahimuot ang inahan nga sa kahiladman nakaingon sab: "Bahala na'g pungkol basta segurado na sa America...! (Katapusan)