Gula 9
Nahimo na nga “open secret” sa kompaniya nila ni Ritchie ug Christy ang ilang relasyon kay klaro na kaayo nga mimabdos ang secretary ni GM Lea.
Hangtud nga usa ka adlaw niana gipatawag si Ritchie sa general manager. “Lingkud Ritchie, daghan kita og panagsultihan,” matud ni Lea nga ning higayona pormal na kaayo’g dagway.
Wala na ang mapahiyumong dagway ni Lea kaniadto panahon nga magsultihanay sila si Ritchie. Katahaan na kaayo karon ang iyang pamorma kay ligdong na ang iyang dagway.
“Gipatawag ko ikaw kay tunog na kaayo dinhi sa kompaniya ang relasyon ninyo ni Christy. Gani gipatawag ko na si Christy ug gitug-an niya nga ikaw ang amahan sa iyang gisabak,” matud ni Lea.
Midugang si Lea “Dihang misugod ko paglingkod isip general manager ning atong kompaniya, nakadungog na ako nga may relasyon kamo ni Camel. Kini gani ang rason nganong giuban ko ikaw sa usa ka miting sa Cebu Chamber of Commerce and Industry usa ka gabii niadto.”
Ingon sa naglibog si Ritchie sa gipanulti ni Lea kaniya. “Nakigsuod ako kanimo sa unang higayon ug gani kita maoy partner sa disco didto sa gitambongan nato nga party. Dili tinuod nga wala ko’y mga kaila sa maong party Ritchie apan gituyo ko kadto.”
Tagsa ra g’yud kaayo mitingog si Ritchie, ingon siya sa natuk-an. Usahay magduko siya kay dili siya makaharong pagtutok ni Lea.
“Kumusta diay ang inyong relasyon ug ni Camel?” gipangutana ni Lea si Ritchie. Wala dayon makatingog ang ulitawo.
Hinay ang tingog ni Ritchie ug gitug-anan ang general manager nga sa hilom nagtoo siya nga gibalhin si Camel isip private secretary ni Mr. Morales didto sa balay niini kay may gusto ang tiguwang sa iyang hinigugma.
Igo lang mipahiyom ang general manager ug nagpanglingo-lingo. “Diha ka masayop sa imong pagtoo Ritchie. Buyno, labing maayo nga mag-abut kitang upat unyang gabii.
Gipunit ni Lea ang cellphone nga diha sa ibabaw sa lamesa ug may gikontak. “Dad, I want to have an informal meeting with you together with Camel and Ritchie in your office tonight.”
Giingnan ni Lea si Ritchie nga dili gayud mosipyat sa pagtambong sa miting aron pag-settle sa isyu. “Siguradoha nga makatambong ka sa miting mga alas sayes sa gabii kay panahon na nga mahibaw-an nimo ang kinatibuk-an.” (Sumpayan pa)