Tentasyon

Gula 8

Human sa nahitabo kanila ni Ritchie ug Christy, nahimong dikit na kaayo ang dalaga ngadto sa ambongan nga executive assistant.

Ang mga mata sa ilang kaubanan sa opisina usahay mabantayan ni Ritchie nga kanunay lang maniid kanila. Daghan man gud ang nasayud nga managhinigugmaay na sila si Camel ug Ritchie.

Wala hinoon malilong sa mga kauban ni Ritchie ang iyang pagka-palakero dihang wala pa niya mahimong hinigugma si Camel.

Misamot ang pagduda sa kaubanan ni Ritchie nga duna g’yud sila’y relasyon ug si Christy tungod kay matag hapon sila na gayud ang magkuyog luwan sa kotse sa ulitawo.

Ang nahitabo kanila ni Ritchie ug Christy nasundan pa og daghang mga susamang panghitabo. Usa ka higayon, naghinuktok si Ritchie kun unsay iyang himoon kun masayran ni Camel nga nakigrelasyon siya’g laing babaye.

Dili kalimdan ni Ritchie ang iyang kaugalingon nga mas in-love siya ni Camel kay kang Christy, ilabi na nga hangtud karon wala pa gayud niya kini maangkon.

Bisan og dugay na kaayo ang ilang relasyon apan wala gayod magpatental si Camel sa mga pagpagilok ni Ritchie kaniya. Wala pa gani gayud makahikap si Ritchie sa ugbon nga butang sa punoan sa duha niya ka paa.

Wala gayud kalimti ni Ritchie ang gisulti ni Camel kaniya usa niana ka higayon.

“Kun tinuod ka nga nagmahal kanako Ritchie, tahura ang akong pagkababaye. Unya ra nako itugyan kanimo ang labing pribadong parte sa akong lawas kun minyo na kita. Kun moabut na kining maong panahon, magmalipayon kita.”

Alang kang Ritchie, maanyag usab si Christy apan sa iyang pagtutimbang-timbang mas bug-at gayud kaniya si Camel. Iyang nahuna-huna nga “ikabilin gayud og balay” si Camel kay dili kini dali nga matintal og lalaki.

Samtang si Christy nakuha ra niya sa tumang kasayon. Nanglabay ang mga adlaw, nakadawat og text message si Ritchie gikan ni Camel.

“Congrats Ritchie, nakakita ka na g’yud diay og bag-ong lover,” ni Camel pa sa iyang text message.

Dugay nga mitubag si Ritchie. Wala siya mahimutang. Nag-alindasay siya nga mora’g nahanaw kaniya ang maayong panghuna-huna.

Nahukman ni Ritchie nga dili lang tubayan si Camel. Wala niya bawsi ang text message niini kaniya. Milabay pa ang daghang mga adlaw, semana ug buwan sa ilang panag-uban ni Christy.

Ang iyang gikahadlokan miabut na gayud. Mimabdos si Christy. Nadungog na g’yud sa ilang kompaniya ang ilang relasyon. (Sumpayan pa)