Dihang hapit na mo-off sa trabaho sila si Ritchie, giduol siya ni Camel. “Uy, unsay akong ikaalagad kanimo Cams?”
“Kuhaon ko karong taud-taud ni Mr. Morales kay duna siya’y ipatrabaho didto sa iyang opisina sa balay. Ayaw na lang ko ihatud karon Ritchie kay basin may lakaw usab kamo si GM Lea,” giingnan ni Camel ang hinigugma.
Pagka ugma sa buntag, nasurpresa kaayo si Ritchie pagsulod niya sa opisina kay bag-o na ang sekretarya ni Lea, dili na si Camel. Gwapa usab kaayo ang maong babaye.
“Ikaw na diay ang bag-ong secretary ni GM Lea?” gipangutana ni Ritchie ang bag-ong kawani.
“Oo, ako na kay si Ma’am Camel tua na gidistino sa opisina ni Mr. Morales sa ilang balay,” dali nga tubag sa babaye. Nagpaila kini nga siya si Christy.
Lain og huna-huna si Ritchie. Nagtuo siya nga dunay pagtan-aw si Mr. Morales kang Camel mao nga gikuha niya kini nga secretary didto sa iyang opisina sa balay.
Gitawgan ni Ritchie si Camel. “Anaa ka na diay madistino diha sa balay ni Mr. Morales? Tan-aw nako naibog nimo ang tiguwang mao nga anaa ka gidistino niya sa balay.”
Igo lang mikatawa si Camel. “Pwede ba’g makigpanuroy ko nimo unyang gabii Cam?”
Sige walay problema, apan mosayo lang ta’g pauli ha kay pasayoon ra ba ko pag-report sa opisina ni Mr. Morales.
Pagka gabii na, didto sila si Camel ug Ritchie nanihapon sa usa ka restaurant sa SM. Wala tuyoa nga naagian sila ni Christy. Pwerteng nakatutok si Ritchie kang Christy nga igwad kaayo’g sampot.
“Gwapa kaayo no ang secretary nga gipuli nako?” matud ni Camel. “Apan walay makatupong nimo sa kagwapa. Ikaw lang ang akong higugmaon Camel.” Lauman nako kana Ritchie.
Human nila’g panihapon, miawhag na si Camel nga magpahatud. Didto sa awto, gihagkan ni Ritchie ang hinigugma.
Nag-ukobay ang masig nila ka ngabil apan mabinantayon si Camel nga miwakli sa mga kamot ni Ritchie nga manghiram sa pribadong parte sa iyang lawas.
“Bitin man kaayo ang atong romansa Camel,” giingnan ni Ritchie ang dalaga.
“Akong igasa kanimo ang akong kaputli kun maminyo na kita Ritchie. Lahi ko nga pagka babaye kay gusto nako nga ang ako rang bana maoy tugyanan ko sa akong pagka babaye,” matud ni Camel.
“Sigurado na bitaw g’yud nga ikaw ang akong pangasaw-on, kana kun dili ka magpatintal ni Mr. Morales nga tan-aw nako may kaibog nimo,” matud ni Ritchie.
Igo lang mipahiyom si Camel. – Sumpayan pa