Tentasyon

Wala pay alas singko sa hapon mibiya na sila si Lea ug Ritchie aron motambong sa tigum sa mga opisyal sa Cebu Chamber of Commerces and Industry.

“Ibilin ra kanang imong sakyanan Ritchie, diri na lang sakay sa akong kotse,” giingnan ni Lea ang iyang executive assistant.

Pag-abut nila sa venue sa miting, didto pa nila nahibaw-an nga human sa ilang tigum ipahigayon diay ang advance Christmas party sa mga opisyal sa kahugpongan sa mga magpapatigayon.

Wala g’yud magdugay ang tigum. Gisunod dayon ang Christmas party. Pabilin nga diha gihapon si Ritchie sa kiliran ni Lea. Maikog siya nga mobiya kay iya kining general manager.

Apan sa hilom, nakagusto usab si Ritchie nga ikauban niya si Lea, ang gwapa nga anak ni Mr. Morales.

Sanglit wala pa kaayo’y mga kaila si Lea sa grupo sa mga inilang magpapatigayon kay bag-o pa siya nga mipuli sa pwesto sa iyang amahan, sila ra si Ritchie ang kanunay’ng magsultihanay.

Dayon gisugdan ang kalingawan sa party. “Mosayaw ka ba Ritchie? Ubani ko, manayaw ta,” giagni ni Lea og sayaw ang ulitawo.

“Hilig usab diay kaayo kini og disco si Lea,” ni Ritchie pa diha sa iyang huna-huna samtang nakigsayaw siya ni Lea.

“Maayo ka man diay’ng mosayaw Ritchie,” nagpahiyom si Lea nga mihunghong ni Ritchie. “Kun may lugar ko, mag-disco ta matag weekend Ritchie.”

Alas dies na sa gabii sila nga mipauli. Gi-drop si Ritchie ni Lea didto sa ilang opisina kay didto ra man gibilin ang iyang sakyanan.

Dihang nakabiya na si Lea, gipaandar ni Ritchie ang makina sa iyang kotse, apan wala dayon kini niya gipadagan.

Gitawgan niya si Camel. “Hi, Camel? Padulong ka na ba nga matulog? Mao pa’y pagkahuman namo sa among gitambongan nga tigum ug Christmas party sa CCCI. Pwede pa ba ko nga moanha diha?”

Gibalibaran na ni Camel si Ritchie nga moadto pa sa iyang gipuy-an kay lawom na ang takna sa kagabhion.

Pagka ugma, didto sa opisina nilang Ritchie, gisugo ni Lea si Camel nga pasudlon sa iyang opisina si Ritchie.

“Ritchie, pasudlon ka ni GM,” may pagkagahi ang tunada sa tingog ni Camel. Nakabantay niini si Ritchie kay dili kini naandan nga bug-at og tingog ang iyang hinigugma.

Wala g’yuy mahinungdanong tuyo si Lea kang Ritchie. Nagsultihanay ra sila sa ilang pagtambong sa tigum sa CCCI. Nagsige og pasiklap si Camel didto sa gawas kay makita man sa bildo nga pultahan.

Hilom nga nasuya kaayo si Camel kay nasabtan niya nga suod na kaayo sila si Lea ug Ritchie. (Sumpayan pa)