Gula 2
Daw pilit kaayo ang tinan-awan ni Ritchie ngadto kang Lea. Sa makausa pa, gibati na usab niya ang kaibog sa batan-ong anak sa iyang agawon.
Nakabantay diay si Camel nga naibog ang iyang boyfriend ngadto sa bag-o nila nga general manager nga anak ni Mr. Morales.
Mingisi si Ritchie dihang gitug-anan siya ni Camel sa iyang nabantayan atol sa tigum nila kaganina uban sa bag-o nila nga general manager. Dugay man gud nga gibuhian ni Ritchie ang kamot ni Lea sa ilang paglamanohay.
“Sige ra Ritchie, walay problema kun imong panguyaban ang bag-o mo nga GM. Dili ko masuko kay imo ang katungod nga mopili og kapikas sa kinabuhi,” kalma nga sulti ni Camel.
Wala molahutay og pakigsultihanay si Ritchie sa maong isyu. Gitakli niya sa lain ang ilang panagsultihanay ni Camel samtang nag-snack sila sa canteen human sa ilang trabaho.
“Unsa kaha’y batasan ni GM Lea no Camel?” pangutana ni Ritchie sa iyang hinigugma. “Maayo man kay ganina gipatawag ko niya sa opisina kay duna siya’y instruction buotan kaayo siya,” dali nga tubag ni Camel.
Samtang nagtrabaho si Ritchie didto sa iyang lamesa, mitingog ang iyang telepono. “Ritchie pasudlon ka ni GM Lea sa iyang opisina,” matud ni Camel.
Gipanguyawan si Ritchie kay una pa kini nga higayon nga gipatawag siya ni Lea. Sanglit bildo man ang pultahan sa opisina sa GM, nakita ni Ritchie nga si Lea naglingkud sa lamesa.
“Lingkud Ritchie,” nagpahiyom si Lea. “Salamat Ma’am,” ni Ritchie pa.
Giawhag siya ni Lea nga dili na lang siya tawgon og Ma’am. Gusto ni Lea nga bisan ang ubang kawani sa kompaniya motawag na lang sa iyang ngalan.
Diha mahibaw-i ni Ritchie nga mapahiubsanon kaayo si Lea dili sama sa ubang GM nga mapahitas-on sa ilang mga kawani.
“Andama ang business profile sa atong kompaniya Ritchie kay duna kita’y tambongan nga miting unyang gabii sa kadagkoan sa Cebu Chamber of Commerce and Industry,” matud ni Lea.
Nabantayan ni Ritchie nga didto sa gawas kanunay’ng nagpasiplat kanila si Camel. Makita ra sila sa sulod pinaagi sa bildo nga pultahan. Taud-taud mitalikud dayon si Ritchie kay aron matuman niya ang gisugo ni Lea.
Pagka hapon, giduol ni Ritchie si Camel. “Sori kaayo Camel ha, dili ko ikaw mahatud karon sa atong pag-off kay iuban ko ni Lea sa miting sa Cebu Chamber of Commerce and Industry.”
Nakabantay si Ritchie nga mikisdom ang dagway ni Camel. (Sumpayan pa)