Duha ka sugilanon: Ang pasko nga gibati ni Pasyo

Paita Pasko na sab. Kung kwartahan lang ko palitan ko untag regalo akong asawa, si Dodong, si Inday ug mga nindot nga beste, mga pagkaon alang sa Noche Buena karong tungang gabii. Kana gyung special ug lamian nga mga putahe nga wala pa nila matilawi. Sama sa Ham, tocino, embutido, fried chicken, inasal nga tagubtob kaayo'g panit, cake nga Goldilocks ug ice cream nga Magnolia.

Panindotan sab unta nako among balay bisag taodan la'g bag-ong mabulokon nga mga kurtina. Dayana'g dekorasyon sa Pasko bisag Christmas tree lang nga naay kometa sa ibabaw ug Belen sa ubos. Espesyal man gud unta rong okasyona kay natawo ang manunubos sa atong mga sala. Maoy panahon sa kalipay, pagmaya, pagbusog, paghudyaka sa matag pamilya."

Daw tiguwang giango-ango, nga nagtibo-tibo ang baba ni Pasyo sa iyang gipanghuna-huna nga mga kabulahanan sa Pasko, nga lisud kahataga’g katumanan gawas na lang kong magmilagro ang kalangitan kay way imposible sa gahum ug kalooy sa Dios.

Mitoo siya sa gahum sa Ginoo. Gidawat niya ang kamatuoran nga anaa siya mahimutang sa labing ubos nga kahimtang. Usa ka magbulogwal og yuta, usa ka manalaka'g lubi, usa ka manglambahay'g isda, usa ka manglabyogay'g tamala, usa ka manginhasay'g kinhason, usa ka ASPO, kun anak sa pobreng etc...

Naglatagaw usab ang kalimutaw ni Pasyo, nga nahisangko ang panan-aw ngadto sa ilang atop nga way kisame, diin tua didto'y tiki nga nakaiti nga nakasabot sa iyang gibati. Kahayag lang sa lamparilya ang nagdan-ag sud sa hagip-ot nilang panimalay. Gisud-ong niya iyang asawa nga gigakos sa ilang duha ka anak -- babaye ug lalaki nga nag-ipog pangatug sa usa ka katre nga kawayan. Samtang siya anaa usab sa iyang kawayan naglingkod human sa pagtinikongkong paghigda.

Alas 3:00 pa ang takna sa kaadlawon matud sa announcer sa radyo nga nagpatukar og mga Paskohanong awit nga gikan sa iyang mini casette recorder nga diha ra sa iyang duol. Bisan pa sa ilang kapit-os may kalipay gihapong nabati siya sa iyang dughan ug alimpatakan nga nakadungog sa maong mga awit sa Pasko. Ambot unsay anaa niining mga awita nga may gahum mang mohupay sa iyang mga kahingawa ug kabalaka. Mora ma'g naangkon niya iyang tanang gikinahanglan.

Mibarug si Pasyo ug giiwagan sa iyang flashlight ang kalendaryo. Labyogon man diay ang dagat karon. Diha sa iyang huna-huna ang mosayo pagpanglabyog og tamala aron daghan siya'g makuha sarang ilang ikasuwa karong pamahaw, unyang paniudto ug panihapon ug para sa ilang Noche Buena, nga sagolan lang kuno niya'g pansit.

Hinay'ng migawas sa pultahan sa ilang balay si Pasyo, bitbit ang mga galamiton sa pagpanglabyo'g tamala. Wa na lang siya mananghid sa iyang asawa aron di kini matugaw sa katulogon. Nalingaw iyang mga mata pagkakita sa balay sa silingang nilang adunahan nga nagilakgilak tungod sa daghang mga series lights. Napuno pod kini sa mga adorno sa Pasko sama sa dakong Christmas tree, dakong Santa Claus, Prosty the Snowman ug dako nga Belen.

"Mayta'g maagian kong Santa Claus padung sa dagat, da, hatagan ko'g pinaskohan." Tugob sa kadasig ang pagpangayo ni Pasyo, nga gikan gayud sa iyang dughan.

Mitampisaw sa dagat si Pasyo. Wala gayud siyay kuha nga tamala sa katulo niyang itsa sa iyang labyog ngadto sa dagat. Takulahaw lang may nagkidlap-kidlap nga kahayag nga misakdap sa dagat dili kaayo layo sa iyang atubangan ug milupad kini sa kapunawpunawan uban sa tingog nga nagkanayon "Merry Christmas! Ho-Ho-Hooohhh!!!.

Giduol ni Pasyo ang dagat nga nagilak-gilak gihapon nga naagian sa naghaguros nga kahayag ug iyang nasuta nga mga nilibo diay kini nga salapi. Iyang gipamunit ug miuli pagdali. Naagian na pod niya ang dakong Santa Claus nga mipahiyom kaniya nga diha sa biranda sa silingan nilang adunahan. (Katapusan)