Tentasyon

Gula 1

Wala malilong sa mga trabahante sa tibuok kompaniya nga gitrabahoan nila ni Camel ug Richie ang ilang relasyon. Kapin na sa duha ka tuig ang ilang panaghinigugmaay apan wala pa g’yud madimdim ni Ritchie ang dugam-is ni Camel.

Bisan giunsa niya’g hangyo ang hinigugma nga manulod sila’g motel, apan hugot ang baruganan ni Camel nga unya ra niya itugyan kang Ritchie ang iyang pagka babaye kun minyo na sila.

Si Camel ra ang nadugay sa mga kamot ni Ritchie nga wala gayud niya mahilabti. Ang uban niyang mga hinigugma nga magpadiki-diki kun hangyuon niya nga manulod sila’g motel, iya dayong talikdan.

Maglisud og talikod si Ritchie kang Camel tungod sa talagsaong kaanyag niini nga wala usab sa ubang babaye. Alang ni Ritchie nga swerte na kaayo siya nga maoy gisugot sa dalaga sa kadaghan nila nga nanguyab kaniya.

Buotan g’yud si Camel. Siya ang secretary sa ilang general manager nga si Mr. Morales. Nagkasuod sila si Camel ug Ritchie kay ang ulitawo mao man ang executive assistant ni Mr. Morales. Biyernes sa hapon, nagpatawag og dinaliang tigum si Mr. Morales sa mga empleyado sa ilang kompaniya.

“Gituyo ko ang pagpatawag og tigum kaninyo kay aron kamo pahibaw-on nga pipila ka adlaw gikan karon, lahi na ang general manager nga modumala niining atong kompaniya,” matud ni Mr. Morales.

Nakurat ang kadaghanan, apil na si Camel. Apan si Ritchie nasayud na niini kay gikonsulta man siya ni Mr. Morales sa wala pa niya ipakanaug ang hukom.

“Mouli na dinhi sa Pilipinas ang akong anak nga dalaga nga nakahuman na sa iyang pagtoon sa Harvard University. Siya na maoy modumala niining kompaniya ug ako magsilbi na lang nga iyang tigtambag,” matud ni Mr. Morales.

Tuod man, miabut ang adlaw nga mipauli na ang anak ni Mr. Morales. Pagka-sunod semana, nagpatawag og laing tigum si Mr. Morales sa iyang mga kawani. Ang iyang tumong mao nga mahimamat sa mga kawani si Lea, ang 21-anyos niya nga anak nga mao na ang tugyanan niya pagdumala sa kompaniya.

Hilom kaayo ang mga kawani dihang mitindog na si Lea atubangan kanila ug misugod na pagsulti.

Si Ritchie diha maglingkod atubangan sa gitindogan ni Lea. Wala kini’y pupamilok nga nagsud-ong sa maanyag nga anak sa ilang agawon. Sa hilom nabihag na usab ang kasing-kasing ni Ritchie.

Human sa tigum, gipaila-ila ni Mr. Morales si Ritchie ngadto kang Lea. “Siya maoy usa sa kasangonan nimo sa mga gimbuhaton dinhi sa kompaniya anak,” matud ni Mr. Morales. (Sumpayan pa)