Faithfully

Sama sa naandan naminaw na sab si Amy sa paborito niyang tulumanon sa radyo nga "Kuya, Maayong Hapon" diin ang anchorman si JTY. Mahinamon siyang nagpaabot sa mga balaknong mensahe nga ipahinungod alang kaniya gikan sa iyang teksmet nga nagpaila lang sa ngalang 'Double M'.

Ang maong tulumanon magsugod sa ala una ang takna sa kahaponon diin si JTY mobasa og suwat-suliran ug mobasa sab sa mga greetings nga gipadangat pinaagi sa pagteks sa selpon.

Nagkateksmet si Amy ug si 'Double M' pinaagi ning maong tulumanon sa dihang miteks si 'Double M' nga nangita siya’g teksmet. Giteksan siya ni Amy hangtod nga nagkasabot sila nga dili na mohunong og teksanay. Nagkita na sila’g ka usa ug namatikdan ni Amy nga daw way kadasig si 'Double M'.

Gisultihan si Amy ni 'Double M' nga duna siyay asawa. Apan miingon si Amy nga 'oks lang' kay gusto lang gyod siyang makighigala ni 'Double M' kay nakagusto siya sa mga garay nga iteks niini kaniya. Apan karong hapona nahisagmuyo si Amy kay wala naman mopahinungod kaniya og garay si 'Double M'. Sukad pa kagahapon. Nakahinumdom siya nga sa nangaging mga adlaw iyang giteksan si 'Double M' nga: "klimti na lang ko dbl m kay duna na god kay kbilinggan'. Nakaingon si Amy nga tingalig nangluod na si 'Double M'. Unya nakahinumdom siya sa awit nga 'Faithfully' nga kanunay'ng ipahinungod ni Double M. kaniya.

Apan sa hapit na matapos ang programang ''Kuya, Maayong Hapon", nadungog ni Amy nga nagkanayon si JTY: "Sa dili pa ako manamilit sa mga suking tigpaminaw, akong ipasupot kining masulub-ong pahibalo: Usa sa akong suking tigpadala og mga greetings nga si 'Double M' mitaliwan na sa laing kalibotan. Matud pa sa iyang mga ginikanan, si 'Double M' dili tinuod nga duna nay asawa. May sakit nga cancer si 'Double M' mao nga magpatuo nga minyo siya aron walay babaye nga mahigugma kaniya kay sakitan man lang unya kini kun makigrelasyon kaniya. Apan miabot gyod ang higayon nga mibati siya’g gugma kang Amy. Tinagalan na diay ang kinabuhi ni 'Double M' mao nga naglingawlingaw kini pinaagi ning atong tulumanon. Ug kagahapon miabot na gyod ang kinutoban ni 'Double M'. Ihatod siya sa iyang kataposang pahulayan sa..."

Gipawong ni Amy ang iyang radyo human niya madungog kun asa ug kanus-a ilubong si 'Double M'. Nakonsensiya si Amy. Nakahinumdom siya sa iyang ubang mga teks nga gipadangat niya kang 'Double M': "Dbl M ayw n pagcge ingon nga d n ko mawa sa imo huna2"; "klimti n lng ko kay duna na ka aswa";" n'nluv ko nimo dbl m pro huna2a imo aswa"; ''ayg na cge huna2 nko dbl m itingob imo huna2 sa imo pmlya klimti ko, nitx ko nimo isip frnd lang." ug uban pang mga mensahe ni Amy nga gituohan niyang nakapasakit sa balatian ni 'Double M'.

Pagkagabii nag-alindasay si Amy. Wa dayon siya makatulog. Ug miabot ang adlaw sa... Didto sa sementeryo. Gibalhog na sa kuwadradong lungag ang gisudlan ni 'Double M'. Nagminatay pagpanghilak ang mga ginikanan, mga igsoon ug kabanayan ni 'Double M' ilabi na sa dihang gihaklap na kadtong kuwadrado ug marmol nga tabon ug gisementohan na ang masigka kilid niini.

Didto sa dili kaayo halayo, may usa ka babaye nga naglantaw sa pagtunod na ni 'Double M' sa kataposan niyang pahulayanan. Naghilak ang babaye. Nagbakho. Ug sa dihang nag-iyahay nag bulag-bulag ang mga nanambong sa lubong nagdali ang babaye paggawas sa sementeryo. Ug didto sa gawas, misakay siyag traysikol ug nagpahatod pauli sa iyang gipuy-an.

Pagkasunod adlaw, usa ka buntag niana, naukay ang mga molupyo sa Brgy. Looc. Sa usa ka balay, sulod sa usa ka kuwarto nakaplagan na lang nga wala nay kinabuhi ang usa ka babaye. Nagbuwa pa ang baba niini. Sa iyang kiliran dihay usa ka botelya sa likidong makahilo nga wala nay sulod. Unya dihay nakit-ang sulat nga nagkanayon: "Papa Dodoy, pasayloa ko nga gibiyaan tika. Moapas ko ni 'Double M'. -- Ang mapinanggaon mong anak, Amy." (Kataposan)