Si Ayesha usa ka 20-anyos nga 4th year college student ug mogradwar karong tuiga sa usa ka unibersidad. Nakig-ipon siya sa lalaking iyang hinigugma sulod sa usa ka tuig. Gipadayon ni Ayesha ang lima ka buwan niyang gisabak bisan sa kadako sa problemang iyang gisagubang. Makapaso ba kaha siya ning iyang kahimtang karon hilabi na nga wala pa gayod sila makasal sa iyang gikaipon nga si Robert?
Nakahukom si Ayesha nga mopauli nalang sa ilang dapit tungod sa mga panghitabo nga giatubang nila ni Robert, apan dili gayod mobuhi ang lalaki sa ilang relasyon bisan sa mga saad ni Ayesha nga mobalik ra gayod siya human pagpanganak.
"Dili ko mosugot Ma nga mahilayo kamo kanako, gusto kong makita ka hangtod sa paghimugso sa atong anak," saysay pa ni Robert.
"Pa, dili mahimo nga magdepende ako kanimo sa tanang panahon hilabi na sa karon nga adunay dakong problema ang imong pamilya. Paminaw ko nagpuno-puno lang ako sa imong responsibilidad, wala kay angay kabalak-an kay makita mo gayod ang atong anak puhon-puhon," tubag ni Ayesha. "Nganong nag-ingon ana ka man Ma aduna ba ako'y pagkuwang kanimo? Aduna ba ako'y reklamo bahin kanato? Gipasagdan ko naman lang gani ikaw sa imong pagkaselosa, bisan imo akong himuan og istorya nga aduna ako'y laing gikalambigit ug nakigkita lang gihapon sa akong mga kanhi. Ma gikatawa ko lang ang tanan tungod kay walay kamatuoran ang imong gipang-istorya bahin nianang butanga. Unsa paman ang akong pangita-on? Ikaw, ang babaye nga akong gihandom ania na karon kanako ug adunay umaabot nga anak. Dili ko ikaw binuangan Ma, makasalig ug makalaum ka kanako, buhaton ko ang tanan alang kanimo.
"Okay! Pa, usabon ko na usab sa pila ka beses, kapila ko naman ikaw gisultihan nga dili ko gusto huwaton mo nga mogawas gayod ang ngil-ad kong batasan atubangan sa imong ginikanan ug sa imong mga igsuon. Parehas kamong mga tag-as og pride, dili ko gusto nga moabot ang adlaw nga ako motingog sa inyong mataglalis kay ngil-ad kong mobuhi og istorya. Tingale lang unya nga mao kana'y mahimong hinungdan sa atong panagbuwag. Maayo nang molikay nalang sa ko kay dili ko gusto og samok, usa pa sab nakita ko nga dili ka pa andam nga mobiya kanila sa pagkakaron. Aduna pa'y laing butang nga makapahiubos kanako, bahin ning akong gisabak karon. Matud pa sa imong ginikanan hilabi na ang imong amahan moalima lamang siya ug sa atong anak kung makauyon siya niini kay lahi daw kini sa una niyang apo ug sa anak sa imong iyaan. Pa dili ko igsapayan kining istoryaha kay mabuhi ko ang akong anak nga wala ang inyong tabang ug wala ang pag-alima sa imong ginikanan. Ang sa ako lang dili nila yatakan ang katungod sa akong anak isip ilang apo, naggikan sa kaugalingon mong dugo. Ania pa'y laing padungog-dungog gikan sa imong igsuon, sigurohon lang daw nga gwapo ang atong anak ug maayo og pangutok parehas sa iyang anak kay matud pa niya ila daw'ng nakita nga ang unang apo utokan gayod sa lihok pa lang daw niini bisan tulo pa ka buwan. Nakapangangha ako og dako, grabe kataas ang tan-aw nila sa ilang kaugalingon para ipaubos nila pag-ayo ang umaabot kong anak nga kung buot hunahunaon ang imong igsuon dili raba gayod makamao halos sa tanan nga matang hilabi na kung utokay lang ang gamiton. Unsa ra mo? Parehas ra gihapon kamo kanako, tawo nga nagyatak sa yuta ug wala gani kamo makatunga kung unsa ang mga butang nga naabot sa akong kahiadman", matud pa ni Ayesha.
Busa dili sila angay mobuhi og istoryang makapasakit kay "everything runs in the blood," matud niya, "and to think I'm not a dull woman like sa iyang asawa nga mora og kuwang-kuwang. They better be careful about their words."
"Kung unsa man ang ilang gipangsulti Ma, wala ako'y labot niana. Ayaw ako og apila kay panggaon ko gayod ang atong anak kay gikan kana sa kaugalingon kong dugo. Kung nahimo nato sa paghigugma sa dili ato nganong dili ko man kini mabuhat sa atong kaugalingong anak? Sige lang Ma, inig-gawas sa atong anak prangkahan ko sila nianang butanga. Maglahi kita sa atong pagpuyo, ang atong huna-hunaon ang kaugmaon sa atong anak. Ma. "Sa pag-abot sa panahon, ikaw ug ang akong anak maoy akong pilion". (Katapusan)