Basketbolan nga nahimong merkado

Nag-abot ug nagkapundok ning sayong kahapunon sulod sa Mediation Office ning dakbayan sila si Kapitana Lina Tibon; iyang anak nga abogada niya, si Atty. Glenda Tibon; Miss Abeth Yares, kihante batok ni Kapitana Tibon; ug Atty. Marjorie Arcilla, abogada sa kihante. Nipasaka og kaso nga Declaration of Nullity of Deed of Donation (pag-anular sa dokumento sa paghatag) si Abeth batok kang Kapitana Tibon. Isip kabahin sa proseso sa pagresolbar sa kaso, ipaagi una og Mediation (kon panag-istoya ug sabutsabot kun wa bay areglo). Mandatory ug compulsory ni nga proseso nga gimando sa husgado.

Sobra kawhaan na ka tuig ang nilabay, ang amahan ni Abeth, sa buhi pa, (kay hilig kaayog basketbol), nihatag o nidonar og luna sa Barangay Kintolimbo aron himoong basketbolan. Sumala sa dokumento nga gipirmahan ni Fernando Yares, ang naghatag, ug ni Ritche Tibon, barangay kapitan kaniadto, ang nagdawat, nga ang luna pagahimoong basketbolan, ug dili gyud usbon ang kagamitan niini. Sulod sa kawhaan ka tuig, basketbolan gyud ang luna.

Unya sa niaging bulan sa Mayo tuig 2009, dihang lain na ang kapitan, si Kapitana Lina na nga anak ni Kapitan Ritche, nahimong merkado ang basketbolan. Tungod sa kasaulogan sa piyesta ni San Isidro Labrador, napuno sa mga stoll ang basketbolan nga giladlaran og naglainlaing tinda. Mga prutas, utanon ug tanang matang sa abot sa umahan nabaligya dinha. May mga nagkalainlaing pagkaon, pan, wafer, hamburger, ug tanang matang sa fast food. May mga karne, isda, buwad ug tanang matang sa abot sa dagat. Nag-abang sa barangay ang mga nagdispli og mga tinda. Kusog ang halin sa mga tinda kay daw nasentro ang basketbolan sa mga pumapalit gikan sa nagkalainlaing silingang barangay. Nalimtan na lang nga ang maong luna basketbolan diay. Nasupak na ang katuyoan sa paghatag ani.

Nagtuo si Abeth nga ang paghimong merkado sa basketbolan, temporaryo lang. Para lang sa piyesta. Apan nasigi na man. Nasumaran og laing piyesta. Hasta sa Mayo 2010. Nangreklamo na ang mga tigbasketbol sa Kintolimbo. Napugos sila pag-adto sa basketbolan sa laing mga barangay diin abogon sila kay di sila taga-didto, ug nasayod ang mga taga-laing barangay nga dunay basketbolan ang taga-Kintolimbo nga kasamtangan, gihimo lang merkado.

Isip heredero, si Abeth, kay anak siya sa naghatag, gusto niyang bawion ang yuta. Siya na lang ang mokolekta sa abang sa mga naninda. Kay sa ang barangay mopahimulos nga mahulog sa illegal, kay nasupak sa kasabutan. Nangunsulta siya og abogada. Nipasaka siya’g kaso pinaagi ni Atty. Arcilla, ug mao na ni karon ang gihisgutan sa diskusyon sa opisina sa Mediator.

"Unsa man? Wa pa moy nakab-ut nga kasabutan?" ni Dr. Noel Penaflor nga maoy mediator nga na-assign sa ilang kaso. Nia ron sila nanglingkod atubagan sa lamesa sa mediator. "Ang ako tang sugyot nga iatras nalang nila ang kaso. Kay nakaayo man sa barangay ang abang sa mga stalls. Nikita man ang barangay"

ni Kapitana Lina. "Ang ako sab, nga punto legal ra man ang gikabangian namo. Kun ibalik ang luna nga basketbolan, di kakwarta ang barangay, apan natuman ang katuyoan sa dokumento. Kun usbon ang paggamit sa luna, manulo ang dokumento. Inig ka nulo, bawion nako ang yuta kay ako may manununod" ni Abeth. "Niay maayong sugyot ay" ni Dr. Penaflor. "Mangita nalang mo Kapitana og laing luna nga gamitong merkado. Daghan pang gusto mohatag og yuta. Unya ang abang tungaan sa barangay ug sa naghatag sa yuta. Aron may ganahang mohatag sa yuta. Kakuwarta gihapon ang barangay. Makapadayon sa negosyo ang mga naninda. Ug makapadayon og gamit ang mga basketbolista sa basketbolan. Happy tanan. Win-win solution" dugang sa doctor. Nakapahiyom ang duha ka abogada. Igo ra man silang mag-obserbar sa mediation. Kun mangunsulta nila ang mediator, anha pa sila katingog.

Nagtinan-away si Kapitana Lina ug Abeth. "Sige. Ok ko ana'' nagdungan sila’g sulti. Naglamanohay ang duha ka abogada. "Huwat lang mo kay ako nang dokdokon ang Compromise Agreement" ni Dr. Penaflor. Nitalikod ug giatubang ang computer sa iyang luyo. (Kataposan) (Sa magbabasang gusto’g libreng konsulta, dad-a ning pahina sa opisina sa tagsulat, sa Sabado).