Bilanggoan nga way gakot

Dugay nang nabungkag ang Luba Gang nga namiktima sa mga depasaheroang mga dyip nga nagbiyahian sa mga dakbayan sa Mandaue ug Sugbo. Sa dose ka membro ining grupoha, tulo na lang ang gawasnon. Ang labing bangis sa tulo si Ritche Tibon nga gikatahong nagtagotago sa Canduman. Siya ang mastermind sa grupo. Ang duha nga iyang walag tuong pangabaga, sila si Byron Espino ug Wilben Duhig. Gikatahong namauli na sila sa ilang tagsatagsa ka probinsiya. Si Byron taga-Negros. Si Wilben taga-Bohol.

Ginganlan silag Luba Gang kay inig human nilag panulis sa usa ka sakyanan, ang konduktor ila gyung dunggabon. Dili hinoon mamatay. Kay ila man lang padutlan ang unod sa sampot og balig duha ka pulgada. Igo lang maospital ang way swerteng konduktor.

Lima sa ilang sakop nangabalhog na sa prisohan. Ang upat nangamatay sa engkwentro sa kapolisan. Sugod sa dekada 90 hangtud sa tuig 2000 ang ilang paghatag og kalisang sa mga pasahero sa ilang matulis nga mga sakyanan. Kasagaran sayong buntag ilang ipanulis. Unya nagduka pa ubang mga pasahero ug mga polis. Wa silay gituyo pagpatay sa ilang mga panulis. Apan may nangamatay tungod sa kahadlok. May usa ka lalaki nga naglingkod dapit sa pultahan. Nilayat samtang nagdagan ang sakyanan. Nabunal ang ulo sa karsada. Hinungdan sa iyang kamatayon. May giatake sa kasingkasing tungod sa kahadlok. May usa ka babaye nabuang kay na-nervous breakdown. Dili nila tuyo ang ubang dautang hitabo. Apan sila gihapon ang mabasol.

Busa, nihimo og kalihokan ang mga polis sa duha ka dakbayan. Gihugpong nila ilang operasyon. Gitawag nilag Task Force Puhag. Ug napuhag gyud nila ang gang. Di sila mohunong hangtod madakpan o mapatay ang nahibiling tulo ka banggiitang mga miyembro sa maong grupo.

Maong nia karon sila sa Green Meadow Commercial Center sa may eskina Canduman. Sumala sa Intelligence Report, si Ritche nagtakuban nga usa ka watch-your-car-boy. Dili siya himangdan sa kadaghan sa mga tawo. Kay giputos iyang nawong og panapton. Daghan mang mamarking nga mga drayber og traysikol ug habalhabal sa maong commercial center. Ug kadaghanan sa mga drayber, nagputos og panapton sa nawong aron may proteksiyon sa abog.

Alas tres sa hapon. Miyerkules. Nihunong daplin sa karsada saylog gamay sa gate sa commercial center ang usa ka kotse nga abuhon. Kotse sa polis. Apan way marka. Kay mismo ang plate number, dili sa gobyerno. Upat ka lalaking polis nga wa nag-unipormi ang sakay. Ang pangulo sa team si SPO4 Rel Becalas. Naglingkod siya sa front seat, tupad sa drayber. Ang duha nga naglingkod sa luyo, sila si SPO2 Jover Campus ug SPO1 Alex Tudtud. Puro sila nag-T-shirt. Maong ang mga karsones. Sapatos guma ang gipangsul-ob. Mora silag bag-ong nahuman og duwag golf. Ug nanghunong dapit sa commercial center aron mag-snacks. Memoryado nila ang hitsura ni Ritche sa mga litrato gikan sa ilang mga opisina. Ug may dala sab sila sulod sa folder nga gibutang sa dashboard sa kotse.

Unang niduol si Rel sa suspek. "Ritche Tibon! Arestado ka!" ni Rel dihang usa ka metro na lang iyang gilay-on ni Ritche nga nagtalikod. Nagtion og pusil sa naulahi. Ang tulo ka sakop nga polis naa ra sa luyo ni Rel. Nahalingi si Ritche pagkadungog sa iyang ngalan. "Nili ho hi Rihi Tion" nguhal iyang tingog. Nagpugong sa putos sa iyang nawong. "Pamatud-i nga dili ka si Ritche Tibon! Tangtanga ang putos sa imong nawong!" mando ni Rel. "Bahig mamahay ka ini hita himo aho awong!" ni Ritche. Sa kalagot ni Rel, siya mismo ang nilangkat sa putos sa nawong ni Ritche. Nalantad ang makalilisang nga hitsura ni Ritche. Wa siyay mga ngabil. Pirmi siyang nagngisi. Way mga dunggan. Way ilong. Duha ka lungag iyang agianan sa pagginhawa. Wa siyay tabontabon sa mata. Nadunot iyang nawong sa sangla.

Niatras sa kalisang si Rel. Ug namalik silang upat sa kotse. Nakumbinsi sila nga ang watch-your-car-boy nga nagputos sa nawong, dili si Ritche.

"Para nako, maayo pa napriso gyud ko sa tinood nga prisohan. Mas grabe pa man akong pag-antos ining kahimtanga. Kamao gyud mokastigo ang Ginoo. Mao na gyud ni gaba nako" masulob-ong tuaw ni Ritche sa hunahuna samtang naglantaw sa kotse nga niarangkada. (Kataposan)