GULA 52
“Gikasulti na nako ang mga ginikanan sa biktima, Sir,” taho sa tenyente.
“Unsay nakuha mong impormasyon gikan nila Tenyente?” sa hepe.
Si Carlo nagpakahilom lang.
“Ambot kaha, Sir,” sa tenyente pa. “Kun unsay imong ikasulti mahitungod niini, pure coincidence ba kaha kini o dili.”
“Ngano man diay, Tenyente?” Sukit sa hepe.
“Sama sa unang bata nga gipatay, pito gihapon ang edad nianang bataa. Ug managsama silang natawo sa Septiyembre 8, 1999.”
“U-unsa?”
“Ug nia pay laing makapatingala, Sir.”
“Unsa man kana?”
“Sama sa unang bata nga gipatay, gipataop sa dughan sa biktima ang baraw nga giluba. Ang puloan sa baraw aduna gihapoy marka nga 666.”
“Dili kaha posible, Dick,” wala makapugong si Carlo pagsagbat sa panagsulti sa duha ka polis, “nga usa ray author sa kamatayon sa duha ka bata?”
“Posible kanang imong pangagpas, Carlo,” matud sa hepe. “Sagdi lang. Himoan dayon namo kini’g imbestigasyon.”
Diha pa untay laing isulti si Carlo apan napakgang siya dihang nabati nila ang kagahob sa mga tawo. Nahalingi silang tulo. Nakita nila nga gidayongan sa duha ka polis ang patay’ng lawas sa bata. Gisunod kini sa mga tawong usyosiro.
“Ayoha ninyo’g pahimutang,” gimandoan ni Maj. Campo ang duha niya ka sakop nga maoy nagdayong sa minatay.
Abtik nga gituman sa duha ka polis ang mando sa hepe. Kadali ra nilang nakarga ang minatay sa dala nilang sakyanan. -- Sumpayan pa