Gula 50
Wala siya’y katahap nga may kalabotan kadtong sindikato sa drugas nga gipangulohan ni Mr. See niining tawo nga naghasol karon kaniya. Bisan unsaon niya’g takdotakdo ang mga panghitabo ug ang mga kasayoran nga iyang nahipos mahitungod sa misteryoso niyang kaaway, dili gayod kadudahan nga may kadugtongan kini sa sindikato. Lahi ug lain kining tawhana nga mikalit lang pagtungha sa iyang dalan.
Nakapanglingo si Carlo. Nahinumdom sa mga kasayoran nga nagpunpon sa kauban niyang detektib mahitungod sa tawo nga iyang gikasangka didto sa Luneta sa kaulohan. Wala siya mahinumdom nga sa nanglabay nga panahon may gikaila siyang Luis Navarro, Miguel Valdez, Ramon Diaz, Sancho Ramirez ug Dante Gatmaitan nga maoy gigamit nga mga alyas sa misteryoso niyang kaaway. Kinsa man gayod kaha kining tawo nga tuhaw lang mihasol sa iyang kinabuhi?
Namatud-an ni Carlo nga dako gayod kaayo ang kayugot sa maong tawo kaniya. Lakip gani ang iyang mga ginikanan naangin sa kasilag niini kaniya. Apan unsay hinungdan nga nasilag kini kaniya? Kun panimalos ang motibo sa maong tawo, sa unsang hinungdan nga manimalos kini kaniya? Wala siya mahinumdom nga may tawo siyang nasad-an. Busa naglibog gayod pag-ayo si Carlo.
Girehistro ni Carlo ang numero sa cellphone sa misteryosong tawo sa phonebook sa iyang cellphone. Maoy iyang girehistro nga ngalan ang usa sa mga alyas niini -- Luis Navarro -- nga maoy motubag isip tag-iya sa cellphone nga may numero nga 0910-8107220. Molutaw ang maong ngalan sa caller ID sa higayon nga manawag sa iyang cellphone ang misteryoso niyang kaaway.
Buntag sa adlaw’ng Sabado. Nagkagubot na usab ang katawhan sa lungsod sa Mabini. May laing bata na sab nga gipatay. Napalgan kini sa usa ka mananagat sa daplin sa katunggan sa barangay Kawayanan. -- Sumpayan pa