Punoan sa Sambag

Gula 1

Ang kahoy’ng Sambag nga nahimutang sa taluktok g’yud sa usa ka dili kaayo taas nga bungtod sa Anonang Norte, lungsod sa Bogo, maoy nahimong saksi sa pagminahalay nila ni Letty ug Nestor.

Nahimo nila nga abutanan ang maong kahoy’ng sambag kay ang balay nila ni Letty nahimutang sa daghang kabalayan sa mga saop sa Hacienda Martinez samtang ang ila ni Nestor didto ra sa pikas bungtod.

Nabatasan na sa duha ka batan-on nga motungas g’yud sila sa bungtod aron adto magtagbo panahon sa hapon. Dunay balay nga nahimutang duol sa punoan sa kahoy’ng Sambag, apan nangamatay na ang duha ka tiguwang nga nagpuyo.

Gawas nga hayahay ang maong lugar nga ilang abotanan, daw panoramic pa g’yud ang talan-awon gikan sa ibabaw sa bungtod kay nag-umbaw kini sa dagat sa Negros.

Tahum kaayo nga sud-ongon gikan sa ilang nahimutangan ang magkasawop nga adlaw nga makita gani g’yud nila nga ang adlaw hinay-hinay kini nga mopasalipod sa bungtod nga nahimutangan sa bulkan nga Canlaon.

Kun mohabol na gani ang kangiob hinay-hinay na nga mosapigad si Nestor sa lawas ni Letty. Iyang pasandigon ang dalaga sa iyang dughan samtang magsandig sila sa punoan sa Sambag.

Usa lang ka tuig ang gintang sa ilang pangedaron, 19-anyos si Nestor ug 18-anyos usab si Letty.

Wala pa gayud mahilabti ni Nestor ang pagka babaye sa iyang hinigugma. Nabatasan na sa bukid nga ang managhinigugmaay, kutob ra g’yud sa gakus-gakus ug hawok-hawok.

Karon sa ilang panagtagbo, humot kaayo si Letty. Nangalimyon ang iyang kahumot mao nga gisugdan dayon ni Nestor ang pagsige’g hawok sa hinigugma.

Klaro kaayo nga gigilokan si Letty sa mga hawok ni Nestor kay usahay mabag-id sa iyang liog ang mao pay pagsugod pagtobo nga bungot sa ulitawo.

Kay suod na lagi sila kaayo, pasagdan na lang gani ni Letty si Nestor nga magsige’g hapohap sa iyang paa samtang magyaka sila ug magsandig sa punoan sa kahoy. Apan wa g’yud makahikap si Nestor sa labing pribadong parte sa lawas ni Letty kay gibantayan gayud kini’g maayo sa dalaga. Karon gisuwayan na usab ni Nestor basin og dili na siya santaon sa hinigugma.

Iya usa nga gibuhong pag-ayo sa mga hawok ang dalaga, gihapohap ang duha ka bungtod sa dughan ug gipasandig sa iyang paa. Gikan nga naghapohap sa paa sa dalaga, hinay niya kining gipaaginod ngadto sa bugdo nga bahin sa punoan sa paa. Wala na siya santaa ni Letty mao nga gibati ni Nestor ang grabeng kahinam. Daw nagtulo ang iyang laway nga miukob sa ngabil sa dalaga. (Sumpayan pa)