"Iingatan ka"

Sa sulod sa kuwarto ni Amy. May gikasulti siya sa selpon. Naghilak si Amy. Gisangpit siya sa iyang papa nga wala pa diay mahikatulog sa pikas kuwarto niadtong gabhiona.

"Amy, naghilak ka diha?"

"Wa Pa, uy," ni Amy pa nga padayong nagdaitol sa iyang selpon sa iyang dunggan.

"Unsay wa nga mora man gani ka'g nagbakho diha?" padayong pakisusi sa iyang papa Dodoy.

"Wa lagi, Pa," ni Amy nga naningkamot nga makahunong paghilak. "Gisid-ok lang ko."

"Gisid-ok ba uroy!" Nahingawa kaayo si Papa Dodoy ni Amy. "Naghilak ka. Ug duna ka'y gikaestorya sa selpon. Ganina ra sa wa pa ta manihapon nakamatikod na ko nimo nga nagsige ka'g teks-teks. Ug karon mitawag na gyod diay nimo kay nakadungog ko nga mihuni nang imong selpon."

"O, Pa. Pahuway na kay matu'g na pod ko," matud ni Amy ug migawas sa iyang kuwarto. Nagpasumangil nga mag-CR pero dala gihapon niya ang iyang selpon. Ug kay naputol man kaganina ang iyang pagpakigsulti sa mitawag sa iyang selpon, didto sulod sa CR iyang gitawagan kadtong nanawag kaniya aron pagpahuwas sa iyang gibati.

Pagkaugma nag-ilis siya pagkahuman nilag paniudto sa iyang papa Dodoy.

"O, asa man ka, Amy, nga nag-ilis man ka?" gisukna siya sa iyang papa.

"Adto ko's Gaisano Grand Mall, Pa, duna ko'y paliton," tubag ni Amy.

"Mao ba? Aw, iuban ang imong pag-umangkon."

"Ayna lang, Pa. Gusto kong ako ra kay gusto sad kong magmalinawon ang akong hunahuna."

"Aw, ikaw god," ni Papa Dodoy niya. Sa Gaisano Grand Mall. Sulod sa usa ka isnakanan may lalakeng nagpaabot kaniya didto sa kinadaplinang lamesa simpig sa bungbong nga bildo. May mga inorder na sa ibabaw sa lamesa. Miduol si Amy ug didto nag-ilhanay na gyod sila sa personal.

"Mar, ato na lang putlon ning atong mga kabuang. Magkalimtanay na lang ta," matud ni Amy nga nagpamahid sa iyang mga luha nga nanubod sa iyang mga mata.

"Ha?" Nakalitan si Marlo sa iyang nadungog. "Karon hinuon nga nagkita na ta, magkalimtanay na hinuon ta?"

"Mar, nahadlok ko. Nahigugma ka nako. Nahigugma sad ko nimo," nagpadayon pagpangagas ang mga luha ni Amy. "Kun paundayonan nato ang atong gibati, samad sa dughan ra'y atong maani. Ginapos ka na sa kadenang papel!"

"Amy, please ... don't forget me. I can't forget you," ug may mga luha sab nga nanambo sa mga mata ni Marlo. "Sa tinuod lang, bisan sa wa pa ta magkita, sige pa lang tag teksanay nadutlan na ko nimo. Unya karon nga nagkaatubangay na ta, misamot pa paglipang ang akong gugma nimo."

"Mao sad ko, Mar, natandog ko sa imong mga garay nga imong gipahinungod nako sa programa ni JTY sa radyo. Nakabig sad ko sa kanindot sa imong mga text messages," mikuha si Amy og tissue paper ug namahid na sab sa iyang mga mata. "Mao gani nga di gyod ta ko makigkita nimo kay nasayod na kung daan nga madebelop gyod ko kun magkita ta. Pero kagabii lakip si Papa napurhisyo na sa dihang mitawag ka nako mao nga mitawag sad ko nimo ug makadesisyon nga makigkita na lang gyod ko nimo aron taposon ang tanan!"

Sa gawas, lahos sa bildo nga bungbong nakita ni Marlo nga kalit lang mikisdom ang panahon. Unya sa tupad nga lamesa dihay nangabot: magtiayon nga may duha ka mga anak nga pulos lalake, bayungbayong ang usa ug ang ikaduha manghod tingali og mga tulo ka tuig. Malipayon kaayo ang ilang pamilya. Sa pagtan-aw ni Marlo sa inahan sa mga bata daw maoy iyang nakita ang panagway ni Jocelyn nga iyang asawa. Ang mga anak niini mao-mao ra sab og pangedaron sa duha pod ka mga anak ni Marlo nga pulos sab lalake. May di masabot nga pagbati nga nangablit sa iyang dughan. Naghinuktok si Marlo. Taudtaod nga paghinuktok. Unya...

"Mar...." gisangpit siya ni Amy. Gitutokan ni Marlo si Amy. Wa makaharong si Amy, milingiw.

"Tana, My. Manggawas na lang ta," ug gigunitan ni Marlo ang tuong palad ni Amy. Nanggawas sila nga nagginunitay sa ilang mga kamot.

Sa gawas mihangad si Marlo ug maoy iyang nakita nga miiway ang dag-om. Misanag pagbalik ang langit.

Nanakay sila'g traysikol. Ug pag-abot nila sa merkado...

"Ayna lang ko'g ihatod sa Looc, Mar. Iyahay nalang tag pauli," matud ni Amy nga nagpanglugod pa sa iyang mga mata. "Naay daghang traysikol, o para Basak. Mag-multicab lang ko. Mosakay man ko anang para sa Cordova."

"Sige. My. Unya ato na lang putlon ang...?"

"Atong putlon ang laing pagbati pero ang..." si Amy ang misumpay.

"Atong friendship magpabilin," midugtong sab si Marlo.

"Mar, just remember the song IINGATAN KA."

Ug sa makausa pa, nagpig-itay sila sa ilang mga kamot. Sa una ug kataposang panagkita. (Kataposan)