Anino sa Kulto

Apan ang iyang tingog gilamoy sa alingisi ug sipa nga mga buto sa kamatayon. Ang mga tawo nga nagsakay sa awtong itom nga pulos nagtaptap sa mga nawong padayon nga mipaulan kanila og mga bala.

Giuban ni Carlo Guieb si Belen sa iyang pagligid sa yuta sa lagwerta sa balay. Gihanginhanginan na sila sa naghadyong ug nagpungasing mga bala sa kamatayon. Nagpadayon ang mga kaaway nga tinaptapan ang mga nawong sa pagpusil kanila. Si Belen nalisang pag-ayo. Ang gibitbit niining plastik wala niini mamatikding nahasalibay.

Nagpadayon pagligid sila si Carlo ug Belen aron paglikay sa nagpungasing mga bala. Ang mga kaaway wala pa gihapon molunga sa pagpaulan kanila og mga bala. Miligid sila ug miligid hangtod nga nakapasalipod sila sa bungdo sa yuta sa landscape sa lagwerta. Dinhi nakahigayon si Carlo paglanit sa armas nga diha sa iyang hawakan.

Mao usay pagtang-on sa butobuto. Kalit nga mibarog si Carlo ug mibalos sa pagpabuto. Ang itom nga awto nga gisakyan sa mga kaaway midali pagbiya sa tungod sa balay. Midagan si Carlo paingon sa gate samtang gipasundan niya’g pusil ang sakyanan nga didto na sa layo.

Naghangos si Carlo nga milunga pagpusil sa awtong itom dihang miliko na kini sa usa ka eskina. Gibalik niya ang armas sa iyang hawakan. Nagpaminti siya sa hilabihang kalagot nga wala siya makaigo bisan usa na lang sa mga kaaway nga mipusil kanila. Midali siya pagbalik ngadto sa nahimutangan ni Belen. Iyang natukmaan ang dalaga nga naghapa gihapon sa yuta nga nagkurog pa sa tumang kahadlok. Gikuyawan pag-ayo ang iyang ig-agaw sa nahitabo dili pa lang dugay.

“Gaw,” gigunitan niya ang tuong kamot sa dalaga. “Luwas na kita.”

“H-hain man sila, Gaw?” ni Belen nga mihinay pagtindog. Wala pa motaliwan ang kaluspad sa nawong niini. -- Sumpayan pa