Nikurog ang toong kamot ni Norelyn Rosaldo nga nagbasa sa sulat gikan sa iyang abogado. Talagsa ra kaayo mahitabo nga ang abogado mopadala og demand letter sa iya mismong kliyente. Ug muholga nga ikiha sa abogado ang maong kliyente. Apan nahitabo ni sa relasyon tali ni Norelyn ug sa iyang abogado nga si Atty. Alex Tudtud.
Gikulbaan si Norelyn ning sayong kahaponon nga nagbasa sa sulat samtang naglingkod sa lantay sa pantawan sa ilang balay sa sitio Herbarium. Nagkanayon ang sulat: "Duna koy ebidensiya nga dili ka sinero nga pagkakliyente. Ang imong gitug-an nako nga premyo sa pagpa-dismiss sa kaso batok ninyo, P30,000 ra. Apan ang tinood, P60,000. Giutang pa gyud nimo imong bahin sa premyo. Gium-um nimo ang P40,000. Palihug ihatud sa akong opisina ang P40,000 sulod sa tulo ka adlaw gikan sa pagdawat nimo ning sulat. Kay kun dili,pasakahan tikag kasong ESTAFA. Andam na ang mga affidavit ni Marivel Bullulan ug Rel Becalas".
Gikiha si Norelyn, Marivel ug Rel og kaso nga Recovery of Possession and Ownership of land. Ang nagkiha nila, ila rang mga silingan nga mga apo sa napalitan nila sa yuta. Sobra 10 anyos na nilang hupot sa yuta sukad sa buhi pa si Noy Fernando nga ilang gipalitan. Dangtag tuig gikan sa pagkamatay sa tiguwang, gikiha silas mga apo nga gustong mobawi sa yuta.
Pagkadawat nilag summons sa maong kaso, si Norelyn dayon ang niboluntaryo nga maoy mangita og abogado. Maayong mamaba si Norelyn.Kay anad sa pangahente. Bisag unsa lay ibaligya. Nakapamaligya siyag yuga ug mga sakyanan. Drayber og habalhabal iyang bana nga si Noel. Apan lupig niya og panguwarta. Tulo ilang anak. Mga gagmay pa. Wa pa nagtungha.
Nibungat og P100,000 nga acceptance fee si Atty. Tudtud. Apan nagpakilooy si Norelyn nga silang tulo way mga kuwarta. Puro naglisod. Si Marivel bag-o lang napordoy ang negosyo. Si Rel bag-o lang naospital ang asawa ug dako kaayo’g gasto. Mao ni diskarte ni Norelyn.
Nalooy ang abogado nila. Natandog sa istorya ni Norelyn. Giestudyuhan ang kaso ug nipasaka og Motion To Dismiss. "Premyohi lang unya ko kun ma-dismiss ning kasoha" sa abogado. "Buotan pa mas pari abogadoha! Sayon ra gyud ilaron" tuaw niya sa hilom.
Pagkadawat nilang tulo sa Order sa husgado nga gi-dismiss ang kaso, nagpundok dayon sila si Norelyn, Marivel ug Rel. Nibilib sila sa ilang abogado. Tiaw moy sulod lang sa tulo ka bulan, na-dismiss ang kaso batok nila."Tagaan natog sayisinta mil pesos si Atty. Tudtud" ni Marivel. "Sige" ni Rel. Wa katingog si Norelyn. Niyango na lang. Kay nahimugso sa iyang alimpatakan ang hinakog nga laraw. Nitunol si Marivel ug Rel ngadtong Norelyn sa ilang tampo. "Ihatod nang attorney karon dayon" ni Marivel. "Ayaw'g langan" ni Rel. Nikabadkabad si Norelyn sa pagsulod sa ilang balay ug nag-ilis. Nilakaw. Nagtuo si Marivel ug Rel nga tua padulong sa bupete sa abogado. Wa diay. Nangompra. Gi-grocery ang bayente mil pesos.
Pagkaugma, niadto dayon si Norelyn sa abogado. "Attorney, nagkasabot mi nga trayenta mil among ipremyo nimo" ni Norelyn. Nakapahiyom ang abogado. Nalipay sa iyang nadungog. Kontento ra man siya bisag pilay premyo. "Apan bayente mil lang una akong mahatag. Bahin ni Marivel ug Rel. Ang ako sa sunod bulan na lang. Kundi, datadatahan lang nako ang diyes mil. Kay drayber ra god habalhabal akong bana. Way klarong kita" ni Norelyn. Nagminghoy. Gidawat sa abogado ang P20,000. Kay wa may sabot kun pila gyud iyang premyo.
"Ay lag sipyata imong saad," ni Atty. Tudtud. Nakapamid-ok si Norelyn.
"Unsa man nang sulata?" ni Noel. Nakamata na diay gikang natulog humag paniudto. "Ha? Ah! AEh!" nakugang si Norelyn. Iya untang tagoon. Apan nakawhat na ni Noel ug gibasa. "Tan-awa ra gyud nang imong kalaki! Di diay tinood nga nakadawat kag komisyon. Premyo diay ni attorney imong gi-grocery" ni Noel. Nataas ang tingog. Nangluspad ug gipaningot si Norelyn. "Um-uma nang suwata. Ug asa kag ibayad ana!" ni Noel nga malagoton. Gihaklapa sa nawong sa asawa ang papel. Gidapuwas ni Norelyn ang papel. "Ato na lang iprinda atong yuta" niya pa nga nagtibi. (Katapusan) (Para sa magbabasa nga gusto’g libreng konsulta, dad-a ning pahina sa opisina sa tagsulat. Iatol og Sabado)