Anino sa kulto

Gula 41

Unya, dihay tuhaw misapigad sa iyang hunahuna. Kauban kaha sa mga sakay niadtong awto nga nagpaatbang sa ilang balay ang misteryosong kaaway nga iyang gika-engkuwentro didto sa Luneta? Nasayod siya nga mianhi sa Bohol ang misteryosong tawo nga iyang gikasangka didto sa kaulohan. Ug kun ania pa kini sa Bohol hangtod karon, posibleng usa kini sa mga sakay niadtong awto nga nagpaniid kaniya.

Ang hunahuna ni Carlo kalit lang nahimong mamugnaon. Nakita niya sa lilas sa iyang handurawan ang iring ug ilaga nga nagginukdanay. Nakasulod ang ilaga sa lungag nga tagoanan niini. Ang iring napakyas sa pagdakop sa ilaga. Apan malaomon ang iring nga mahulog ra gihapon sa iyang mga kamot ang ilaga sa kapulihay.

Naputol ang paghanduraw ni Carlo dihang may traysikol nga mihunong tungod sa gate nga puthaw. Dihay pasahero nga mikanaog. Si Belen. Ang traysikol mibiya dayon ug si Belen misulod sa gate. Miduol kini kaniya nga nagbarog sa lagwerta. May gibitbit si Belen nga plastik. Wala na mangutikuti si Carlo bahin sa sulod sa maong plastik.

“Nganong nia ka man dinhi, Gaw?” Nangutana si Belen nga ingon sa matingad-on. “May gihulat ka ba?”

“Wala man gaw,” tul-id nga tubag ni Carlo. “Pero may gikatingad-an ko kaganina.”

Mikunot ang agtang ni Belen samtang mitutok kang Carlo. Nagpasupot og pangutana ang tinan-awan niini kaniya. Nakasabot si Carlo, busa mihagad na lang siya sa pagpatin-aw sa iyang gisulti ngadto sa iyang ig-agaw.

“Kaganina may nakita kong awto nga itom nga nagpaatbang dinhi sa balay,” tug-an ni Carlo.

“U-unsa?” nakasuna si Belen nga gikapyotan sa kahikugang. “Itom nga awto?” -- Sumpayan pa