Gula 3
Sa laktud, nahitabo g’yud sila Gloria ug Roger niadtong gabhiona nga misulod sila sa Q2 Motel.
Wala makapugong si Gloria sa paghilak tungod kay nahuna-huna niya ang tugon sa iyang mga ginikanan dihang mianhi siya sa dakbayan aron manarbaho.
“Pagtinarong baya g’yud didto sa syudad anak kay ikaw maoy paglaum namo ni Papa nimo nga makatabang sa imong mga gagmay pa nga manghud.”
Giam-aman ni Roger ang hinigugma ug giparaygan, gipahiran sa mga luha ang mga mata. Gipasaligan nga dili kini pasagdan.
Nasundan pa og daghang mga higayon ang ilang pagtagay sa kalipay sulod sa Q2 Motel nga nahimo na nilang suki. Hangtud nga miabut ang gikahadlokan ni Gloria… mimabdos siya.
Miundang na si Gloria sa pagtrabaho. Nakahukom si Roger nga adto na sila mamuyo si Gloria sa ilang lungsod sa Maasin.
Wala gayud makahatag og kaharohay sa pagpuyo si Roger ngadto ni Gloria kay ang iyang kinitaan isip yano lang trabahante sa arrastre sa pantalan halos dili paigo.
Usa ka gabii sa adlaw’ng Sabado pag-uli ni Roger gikan sa trabaho, gitunolan lang ni Roger og P700 si Gloria kay duna pa siya’y ubang gibayran gikan sa iyang sweldo.
Daku na ang ilang gasto kay may anak na sila. Tulo ka buwan na si Baby Dianne nga maoy bunga sa ilang kinawat-kawat nga kalipay.
Subo kaayo si Gloria. Walay tingog-tingog nga midawat sa kwarta nga gihatag sa iyang bana. Buwad ra intawon ang ilang sud-an niadtong gabhiona.
“Ger, nakahuna-huna ko nga moadto sa Manila aron motrabaho. Dili na ko makaantos sa kalisud sa atong pagpuyo. Bisan giunsa nako pag-budget kuwang g’yud ang kwarta nga imong ihatag nako,” naghilak si Gloria.
Gitutokan ni Roger si Gloria. Natan-aw tuod niya nga mihugo g’yud si Gloria. Wala na kadtong bugol nga aping ni Gloria kaniadto. Halos makita na gani ang bukog dapit sa iyang liog.
Pagka buntag, sayo kaayo nga naghikay og pagkaon si Gloria para makakaon si Roger ingon man makadala kini og iyang bawon.
Sagad g’yud nga buhaton ni Roger nga binlan g’yud og hawok ang iyang asawa sa iyang paglakaw.
“Pag-ayo-ayo dinhi Glo, pasayloa ko nga wala makahatag og kaharohay sa atong pagpuyo,” matud ni Roger.
Wala motingog si Gloria. Wala niya pahibaw-a si Roger nga kadto na ang katapusan niya nga paghawok kaniya. (Sumpayan pa)