Anino sa kulto

GULA 37

 Si Carlo nagpabilin lang sa kahilom. Igo lang siyang namati sa gipanagsultihan sa duha.

“May nakita kong marka nga gikulit sa puloan sa baraw, Sir,” ni Valera.

“U-unsa?” mikunot ang agtang sa hepe samtang mitutok sa tenyente.

“Bitaw, Sir,” mipatuod si Valera. “Tulo ka numero ang gimarka, ang 666.”

“666?” nakasuna si Maj. Campo nga giyugyog sa kahikugang.

Miigham si Carlo. Niining tungora, naikag siya pagsagbat sa gipanagsultihan sa duha ka polis.

“Dili ba mao man kana ang timaan sa daotan, Dick?” ni Carlo.

“Husto ka, Carlo,” ni Maj. Campo nga miuyon sa gisulti sa sekreta. “Ang 666 mao ang simbolo sa satanismo.”

“Kun mao kana,” ni Valera pa, “unsa may buot ipasabot niini, Sir?”

Igo lang nagkatinutokay sila si Maj. Campo ug Carlo sa pangutana nga gipasupot ni Lt. Valera. Daw sa managsama silang nagpanghikap og tukmang tubag sa pangutana sa tenyente. Apan walay ideya nga nasikop ang ilang hunahuna.

“Mas maayo tingali nga sa kuwartel na lang kita magtiwas og sulti, Tenyente,” mihukom ang hepe pagkilab sa pipila ka gutling.

“Ikaw ang mag-igo, Sir,” sanong sa Tenyente.

Mibiya sila sa sapa. Samtang naglakaw sila sa tadlas sa kaamorsikohan paingon sa karsada, ang kaisipan ni Carlo mibuhi og konklusyon: Wala gayod siya masayop sa iyang pangagpas. May tanghaga gayod nga nagpaluyo sa kamatayon sa bata!

Pag-abot ni Carlo sa balay, iyang naabtan ang iyang Tiya Marta nga nanglimpiyo ug nagpahimutang sa mga gamit sa sala. Miyanghag kini pagkamatikod sa iyang pagsulod. -- Sumpayan pa