Gula 56
Dihay kausa. Human sa tagsatagsa namo ka klase sa gabii, gihagad ko si Anita nga manuroy mi sa Plaza Independencia. Nisugot siya. Nanuroy dayon mi. Samtang didto mi sa plasa, naghunahuna ko’g paagi kun unsaon aron madala ko siya sa usa ka pribadong dapit.
Samtang nagtupad mi’g panglingkod, nag-inartista ko. Nagpaguol-guol. Gituyo ko ang pagpamug-ot sa akong panagway ug wala koy tingog-tingog. Gusto kong mamatikdan ni Anita nga nasubo ko. Gituyo ko kadto aron pagkuha sa iyang simpatiya.
“May problema ka ba, Jose?” Gipangutana ko ni Anita.
Sa hilom nahimuot ko. Misalir ang akong diskarte.
“Nganong nakapangutana ka man og ingon niana?” Nagpatuso-tuso ko ug misumbalik pagpangutana kaniya.
“Masulob-on man gud kaayo ang imong panagway,” ni Anita pa.
Gibuhian ko ang tinuyo nga panghupaw.
“Unsa bay imong suliran, ha?” Gikan ni Anita. “Sultihi ko. Basin diay kun makatabang ko nimo.”
“Dako kaayo ang akong problema, Anita,” nagpadayon ko pag-inartista.
“Sultihi lagi ko. Ayaw soloha ang imong problema.”
“Dili ni ang tukmang dapit sa pagpadayag sa akong suliran. Personal kaayo kini ug di ko gustong may laing makadungog.”
“Kun mao, mangita ta’g laing dapit nga magkasulti ta’g maayo. Kanang way makasamok nato. Kanang dapit nga duna tay privacy.”
Hilom kong gikalipay ang sugyot ni Anita. Nako pa sa hilom, mao na kini ang higayon nga akong gipaabot. Busa, wala ko maglangan. Gidala dayon nako si Anita sa usa ka baratohong motel sa downtown. Wala magpanuko si Anita pagkuyog nako ngadto sa maong pribadong dapit. -- Sumpayan pa