Salin sa nahurot

“Pagkakuwanggol gud nimo Masyong, nahibawo ka man unta nga lima kana ka buwan nga gitaban si Noring ni Goyong, makigminyo ka lang gihapon?” lanog kaayo ang siyaok sa tingog ni Uray Biyana ning kasayo pa sa kabuntagon.

“Bahala na lang Nay Biyana, sa nahitabo kang Noring?” ni Masyong pa nga hugot kaayo nga mipakanaog sa iyang hukom nga magpakasal kang Noring.

Dili ikalimod nga sa gidak-on sa paghigugma niya kang Noring wa niya igsapayan nga gitaban ang iyang hinalaran ni Goyong.

“Basin baha mosibog ka sa imong plano nga magpakasal kanako?” ni Noring pa nga sagol pinaluray ang sinultihan.

“Pakaslan ko gayod ikaw Noring bisan tuod salin na ikaw sa nahurot!” Pintok ug way liko-liko nga namulong si Masyong.

Wa gayod malilong sa kinatibuk-an nilang dapit ning ilang balangay sa Kalapayan nga nakigminyo si Masyong sa babaye nga matawag og segunda mano.

Sa gabii...human sa kasal ni Masyong ug Noring, ning ilang dakong simbahan sa lungsod sa San Fernando, naghinubra gayod ang kaluhag ni Masyong nga sa unang higayon madimdim niya si Noring bisan tuod nakuniskunis na ni Goyong ang kaputli sa iyang napangasawa.

“Siong...kumosta? Wa ka bay namatikdan? Kun aduna man gani...sultihi ako darling kong Masyong?” sobra kaparaygon ang panuni sa sinultihan ni Noring.

“Ngano gud nga wa Noring?” daling tubag ni Masyong.

“Mulahoy na man lang gani sa kalugak?”

Ambot unsang pagkaunsaa... nga kalit man lang mikulima ang hitsura ni Masyong. Nagping-it.

“Siong...unsay nahitabo kanimo? Dili na man madibuho ang imong hitsura?” nagpakaaron ingnon nga nagpakisayod si Noring.

Unya...dihay gihagawhaw ni Masyong ngadto kang Noring nga sila rang duha ang nakabati. “Unsaaa...mayyy...imongggg...inantigonggg...   diskarteee...mahalll kongggg...asawaaa....ngaaaa... hilabihannnn...manggg.... hugotaaa?” nag-utnga nga nangutana si Masyong.

“Gisikit ko ang duha ka paa..aron matagamtam nimo nga dili pa diay ako salin sa nahurot ni Goyong!” Nagkatawa nga namulong si Noring. (Kataposan)