Anino sa kulto

GULA 30

Nakadayeg usab si Carlo sa kabatid ni Agent W-9 nga maoy nakahagdaw sa maong mga impormasyon. Sulod sa usa ka semana nakahimo na kini’g dakong agi sa pagpangespiya sa tawo nga nakahatag og tanghaga kaniya. Hinuon, wala siya mahibulong kun nganong nakakuha si W-9 sa maong kasayoran. Sama kaniya, maayo usab og track record si W-9 sa natad sa panitik. Sensitibo kaayo kini’g pamatyag.

Karon si Carlo na ang motiwas sa pagpangita sa misteryoso niyang kaaway nga sakop sa Kultong Tambayawan Black Brotherhood.

Nakadungog na si Carlo og estorya bahin sa mga kulto kaniadto nga nagtungha pa siya sa Harvard. Adunay daghang kulto didto sa ubang kanasoran, ilabi na sa India, Africa, Zimbabwe, Haiti ug uban pa. Apan wala niya hatagi’g gibug-aton ang maong matang sa mga pundok, partikular na ang Tambayawan Black Brotherhood. Mao nga diyotay ra kaayo siya’g ideya ug nasayran mahitungod sa maong pundok. Wala gani siya makatugkad sa hingpit nga lintunganay niining gitawag og ‘kulto.’

Wala magdahom si Carlo nga nakasulod na sa Pilipinas ang Tambayawan ug makahatag kaniya’g suliran ang maong pundok karong panahona. Ang buhaton niya karon mao ang pagpanghagdaw og kasayoran bahin sa maong kulto. Nakahatag kini kaniya’g dakong interes. Kinahanglang mailhan niya ang mga sakop sa maong pundok. Nagtuo siya nga kini ang maggahas og dalan aron mailhan niya ang misteryoso niyang kaaway.

Mipadayon si Carlo pagpakli sa mga papel diha sa folder. Gitamdan niya ang cartographic sketch sa panagway sa misteryosong kaaway. Nakuha gayod sa dibuhista ang panagway sa tawo nga iyang gikasangka. Mao gayod kining dagwaya, niya pa sa hilom.

Ang panan-aw ni Carlo inanay nga midailos ngadto sa ubos sa cartographic sketch. Dihay caption nga gibutang: Luis Navarro, Miguel Valdez, Ramon Diaz,Sancho Ramirez ug Dante Gatmaitan. Mao kini ang mga alyas nga gigamit sa misteryoso niyang kaaway. Wala hisayri ang tinuod nga ngalan niini. -- Sumpayan pa