Adlaw sa paghukom

Nagpundok ang managbarkada sa balay ni Lerra, lalaki ug babaye. Pulos sila mga batan-on. Dunay panglantaw sa umaabot. Pulos sila mga estudyante sa kolehiyo. Ug kun adlaw nga Domingo, magkita gyod sila. Bisan unsa lang ang ilang hisgotan.

"What's our topic now, my friends?" Gibali ni Lerra ang gisugba niyang mga isda. Ingon sila niini kun magpundok, anhi sila maniudto sa dakong lagwerte sa balay ni Lerra.

Mag-amotay sila alang sa ilang paniudto.

"Well, ang topic ta karon mao ang barangay eleksiyon. Hapit na," tubag ni Toper nga nag-atiman sa iyang gilung-ag nga kan-on.

"Tuod, no. Hapit na man diay ang barangay eleksiyon?" Timang ni Digna nga naglunod sa mga utanon. Siya ang nag-asikaso sa paglutog utan aron duna silay sabaw nga mahigop.

"Unya?" Dihay misalga nga barkada.

"Aw, as usual, tan-awon nato ang future. Unahon nato pagsusi ang mga kandidato. Kun unsa sila, kun kinsa sila. Di ba corrupt. Moserbisyo bag tinud-anay sa atong komunidad para sa kaayohan."

"Bitaw. Mao nay angay nga buhaton. Kitang mga batan-on maoy paglaom sa nasud. Dili sayon ang katungdanan sa opisyal sa barangay, nia dinhi ang mga problema, ang gamot sa mga problema sa tibuok nasud. Angay lang nga mamili tag kandidato nga tinuod nga nagmahal sa atong barangay." Miyanguyango si Lerra.

"Kitang mga batan-on magpakabana gyod og tinuoray sa eleksiyon. Aw, kun tagaan tag kuwarta ni bisan kinsang kandidato, atong dawaton kay wa man nato ni pangayoa. Pero ang atong botaran kadto gyong kandidato nga gituohan nato nga maayo."

"Kopras!" Sal-ot sa laing barkada. "Koprason nato ang kuwarta sa mga kandidato nga way ayo."

"Molang!" Mikatawa si Toper. "Way kandidato nga mosudya nato, uy, kun nganong wa nato siya botari nga naghatag man unta siyag kuwarta nato. Ayog masayran sa publiko nga namalit siyag boto. Vote-buying god na, supak sa balaod!"

Unya naluto na ang tanan. Andam na ang ilang paniudto.

Isig sukad ang managbarkada. Sa kan-on. Sa sud-an. Malipayon sila nga nangaon. Nagpadayon sila paghisgot sa eleksiyon. Ilang gikasabotan nga ang ilang katungod sa pagbotar mao gyoy ilang ipatigbabaw. Di mahadlok. Di magpadala sa dektar sa taas ug dagko nga mga politiko. Di masilaw sa kuwarta. Ang kandidato nga gusto nila mao gyoy ilang isulat sa ilang balota.

"Usa ka pagpamilok, mahurot na ang kuwarta nga ilang ihatag. Pero ang serbisyo nga gikinahanglan alang sa kaayohan sa atong komunidad kanunay nga atong gilaoman. Di ta makalaom sa kandidato nga self-interest lang ang gitan-aw, ang kaugalingong kaayohan lang ang gilantaw," matud ni Digna.

Unya nanug-ab sa kabusog ang managbarkada. Gibati usab nila ang kabusog sa ilang kaisipan ug kasingkasing sa mga butang nga ilang gihisgotan. Nasayod sila nga midulot sa ilang kaugalingon ang pagbayloay nila sa hunahuna bahin sa barangay eleksiyon.

"Sige, kay busog na man ta, mopahuway una tag kadyot. Mangadto ta sa among kalubihan kun malandong na. Maglamaw tag butong," matud ni Lerra.

Misuliyaw sa kalipay ang managbarkada. Ang mga ginikanan ni Lerra ang giilang labing adunahan sa ilang dapit. Dako silag kalubihan. Unya isig pahimutang sila sa dakong lagwerta nila ni Lerra aron mopahuway. Samtang sa ilang hunahuna, natawo ang dakong paglaom nga sa umaabot mahatagan og kinabuhi ang gisulti ni Dr. Jose Rizal nga ang mga batan-on maoy paglaom sa nasud. (Kataposan)