Gula 8
“May paglaum ba ang akong gihalad nga gugma kanimo Lyn?” daw sa may kalumo ang mga pulong sa batan-ong abogado dungan sa pagpislit niya sa tuo nga palad sa dalaga.
Mitutok kaniya si Lyn apan taud-taud g’yud nga wala makatingog. “Sa sunod natong panagkita Rex, mahibaw-an nimo ang akong tubag. Ayaw kaayo pagdali kay wala ka pa makaila kanako sa hingpit.
Nangaon sila. Si Rex pa maoy mibutang og mga pagkaon ngadto ni Lyn. Halos na lang niya kini hungitan aron pagpaila sa daku niyang pagmahal.
“Ikaw Rex, pila na kabuok ang imong ka-steady karong higayuna,” gisukna ni Lyn ang batan-ong abogado kay dili siya makatuo nga wala kini hinigugma.
Milingo-lingo si Rex ug wala dayon mitingog. “Nakabaton na ako og usa ka hinigugma Lyn, apan wala’y swerte napamabdosan sa laing lalaki. Sila na karon ang nagtipon.”
Nabantayan ni Lyn nga daw masub-anon si Rex nga misaysay sa iyang kaagi. “In-love ka g’yud diay kaniya kay mora’g dulot sa bukog ang imong kasub-anan nga nagkabuwag kamo.”
“Lyn kun dawaton mo na ang akong gugma, maayo na tingali nga magminyo na lang ta. Mahadlok ko nga basin og mailog ka pa sa laing mga lalaki nga nangindahay nimo,” matud ni Rex nga nagpahiyom.
Gusto na g’yud unta ni Lyn nga sugton na lang dayon niya si Rex apan nabalaka lang siya nga ingnon unya sa ulitawo nga humok og ilong kay mosugot ra og kausa pangulitawhan.
Diha usab sa huna-huna ni Lyn ang iyang kaagi nga posibleng mausab ang pagtagad ni Rex kun masayud nga dili na siya birhen kay may nahitabo na man kanila ug sa ig-agaw niya nga maoy una niyang hinigugma.
Pag-abut nila sa gipuy-an ni Lyn, migawas g’yud si Rex sa kotse ug siya ang mibukas sa pultahan sa kotse diin didto maglingkod si Lyn. Butang kini nga gikahinangop kaayo sa dalaga.
Gitutokan siya ni Rex. Nagtinutokay silang duha ug wala nila palandunga nga ang sunod nga nahitabo inanay na nga nagtagbo ang masig nila ka mga ngabil.
“I love you Lyn,” gigakus ni Rex ang dalaga. “I love you too Rex,” paraygon na kaayo ang tuno sa tingog ni Lyn ngadto sa batan-ong abogado.
Halos dili mahimutang si Rex sa kalalim dihang nabatyag niya nga ang tumoy sa duha ka bulkan sa dughan sa dalaga midaitol sa iyang dughan.
“Salamat kaayo Lyn sa pagdawat mo sa akong gugma, I’ll promise that I will be true to you,” dayong hawok na usab ni Rex sa ngabil sa dalaga. (Sumpayan pa)