Gula 26
“Taga Cebu ang among kagikan,” tubag sa hepe. “Pero didto ko nagdako sa Negros. Didto ko makatapos sa pagtuon sa Georgetown University sa Washington, DC.”
Wala motingog si Carlo. Sa hilom nakadayeg siya sa kangilngig usab sa background sa hepe kalabot sa propesyon niini. Nasayod kaayo siya nga taas ang standard sa pagpanudlo sa Georgetown sa kursong Criminology. Hi-tech ang maong tulonghaan. Daghan nang nagtungha sa maong unibersidad sa lainlaing kurso nga nahimong inila ug halangdon sa lainlaing mga nasud. Usa na si Presidente Gloria Macapagal-Arroyo sa Pilipinas. Sama sa Harvard University sa Boston, Massachusetts diin siya nagtungha, ang Georgetown taas usab og kalidad sa pagpanuon.
Alang kang Carlo, dili usab diay basta-basta ang pagka-polis ni Maj. Campo. Angayan gayod kini nga mahimong hepe. Ug dili kay kana ra. Posibleng dali rang masaka ang ranggo ni Maj. Campo. Nakaseguro siya nga makighigala gayod niini ang promosyon.
“Ang akong first assignment didto sa Leyte,” mipadayon pag-asoy si Maj. Campo. “Pero wala ko magdugay didto. Gibalhin ko sa Sariaya, Quezon ug unsa pa kadtong ubang lugar. Hangtod nga nabalhin ko dinhi. Nakagusto sab ko dinhi kay dali ra kong makapauli sa amo kun gusto kong moduaw sa akong pamilya.”
Igo lang miyangoyango si Carlo.
“Tuod diay, Carlo,” sa hepe nga midalikyat og sid-ing sa relong Omega nga diha sa bukton niini. “Unsay akong ikaalagad kanimo karon?”
Miligdong ang nawong ni Carlo. Karon pa siya makamatngon nga diriyot na diay hinuon siya malimot sa iyang tuyo sa hepe. Unsaon nga nalingaw man siya’g pakisusi bahin sa propesyon ug pagkatawo niini. Milanat gayod og dugay ang iyang pagpangukit kang Maj. Campo. -- Sumpayan pa