Kaso nga natulog

Dugaya nahukman atong kaso sa Court of Appeals oy!" reklamo ni Marivel Bullulan nga nagping-it ang nawong. Naglingkod siya ning sayong kahapunon atubangan sa lamesa ni Atty. Jomar Suprema, iyang abogado. Nibisita siya sa bupete sa abogado aron makapahungaw sa iyang yangongo. Napulo ka tuig na nga natulog ang maong kaso sa Court of Appeals.

Nidaug si Marivel sa Regional Trial Court sa kasong Declaration of Nullity of Deed of Sale (pagpaanular sa dokumento sa palit). May titulado nga yuta si Marivel. Iyang giprinda ngadto ni Mary Jane Masbang iyang ig-agaw. Dihang lukaton na niya, nibalibad si Mary Jane. Kay niya pa, gibaligya na ni Marivel ngadto ni Mary Jane ang yuta. Gipakitaan si Marivel sa titulo nga naa na sa ngalan ni Mary Jane.

Hilabihang lagota ni Marivel. Giukay niya ang mga papeles sa Register of Deeds. Nakakuha siya’g Deed of Sale nga konohay pirmado ni Marivel. Gi-forge (gikopya) iyang pirma. Natataw niya sa dokumento. Dili tinuod ang pirma nga napatik sa dokumento.

Nikonsulta dayon siya ni Atty. Suprema. Gipahiling sa abogado ang dokumento sa handwriting expert nga si Rel Becalas. Namatud-an nga forgery ang pirma sa dokumento. Nihimo dayon og Report si Rel mahitungod sa iyang panahom.

Tuig 1995 nipasaka si Marivel og kiha sa RTC batok ni Mary Jane. Dangtag lima ka tuig nahukman ang kaso. Niapelar pa gyud si Mary Jane. Bisag way lig-ong ebidensiya.

"Pasensiya ka na. Kay di man gyud nato maduol ang mga huwes sa Court of Appeals. Maghuwat lang gyud ta" sa abogado. "Kanang makasulod ta’g husgado, nindot kaayo basahon ang Vision/Mission Statement sa husgado. To provide efficient and effective legal service to the public. Di ba pagya man nga Justice delayed, justice denied?" ni Marivel. "Mao nay gitawag og lip service. Serbisyo sa baba lang. Wa sa buhat," sa abogado. Nipahiyom. Nanabon sa baba.

"Unsa may atong mahimo ani, attorney? Naputos na ko sa utang ug tanto nga naglapilapi. Ang acceptance fee, mga appearance fee ug attorney's fee akong gipamayad nimo, puro inutang. Nasayud bitaw ka nga akong bana mananagat lang. Ug giswerte lang ko nga nakapanunud og gamay'ng luna sa akong mga ginikanan. Mao ni akong gitikad. Apan gipahimudsan na ni Mary Jane, banyagang dako! Kay nabalhin man ang titulo sa iyang ngalan!" ni Marivel. Nagpamente.

"Upat ka butang imong kapilian" sa abogado. Nakonsensiya nga nakautang iyang kliyente sa kamahal sa iyang mga PF. "Daghan diay ta’g mahimo?" ni Marivel. "Daghan. Pero di madungan" sa abogado. "Unsa man?" ni Marivel. "Una, maghuwat ka lang sa hukom. Wa kay buhaton. Ikaduha, mo-file kag Motion For Earlier Resolution. Ikatulo, mangita ka’g fixer. Ipakuot ang desisyon. Kana maoy lisod. Ikaupat, magluhod kang maglakaw sa Redemptorist Church ma-Miyerkules ug sa Basilica ma-Biyernes. Pangayoon nimong Mama Mary ug Senyor Santo Niño mahukman na ang apelasyon" sa abogado. Namid-ok ug nihangad sa kisame si Marivel.

"Kun modangop ta’s Media?" ni Marivel. Nitutok sa abogado. "Kana maoy di nako ikatambag nimo. Way makapugong nimo kun imo nang buhaton. Apan ayaw gyud dad-a akong ngan nga nananghid ka nako. Kun moadto ka’s media, ingna gyud nga wa nasayod imong abogado sa imong gibuhat" sa abogado. Naseryoso. "Nganong dugay man gyud mahukman ang kaso?" ni Marivel. Niping-it na sab. "Tungod sa kadaghan. Bation og katapul ang mga huwes. Lud-on magtan-aw sa mga record sa kaso nga nagtipun-og. Maglabi sab ilang bakasyon, seminar, simposyum ug uban pang mga lakwatsa sa abogado.

"Unsa may imong ikasugyot?" sa kliyente. "Mo-file lang ta’g motion" sa abogado. "Pilay akong bayranan ana?" sa kliyente. "Way bayad. Unya na lang ko bayri inig gawas sa desisyon sa abogado. "Apan maghuwat lang gyud gihapon ko sa hukom?" sa kliyente. "Sakto. Maghuwat lang gyud gihapon" sa abogado. "Puwede huwaton nako ang motion? Ako lay mo-file" ni Marivel. Nipahiyom. Nipindot dayon si Atty. Suprema sa buzzer alang sa iyang sekretarya nga si Teddylyn Reyes. (Katapusan) (Para sa nakabasa nga gusto’g libre nga konsulta, dad-a ning pahina sa opisina sa tagsulat. Iatol og Sabado)