Cheer Dance

Gula 6

Nagpanglingi si Ruth nga naglakaw paingon sa taytayan nga giingon ni Glenn nga adto siya magpaabot.

Paspas ang paglakaw ni Ruth, sagol lingi, kay nahadlok siya kay mingaw na kaayo ang kagabhion.

Pag-abot niya sa may taytayan, wala siya’y nakitang tawo. Milingi-lingi siya.

Taud-taod, nakadungog siya’g sitsit gikan sa usa ka tawo ug takulahaw lang nakita niya si Glenn nga migawas gikan sa gipasalipdan niini.

“Dali kuyog nako,” ni Glenn pa dayong gunit sa iyang kamot. “Asa man kita paingon Glenn?” gisukna siya ni Ruth nga daw nag-uknol-uknol sa paglakaw.

“Adto ta sa akong gitagoan nga balay sa akong Tiya,” dali nga tubag ni Glenn. Nahiabot sila sa usa ka gamay’ng balay. Ngiob kaayo ug ang naghatag og dan-ag mao ra ang suga sa layo nga poste.

“Kinsa’y tawo dinhi?” nangutana si Ruth. “Kita ra ang dia karon Ruth kay bag-o pa kining gibiyaan nilang Tiya kay namalhin sila sa pagpuyo sa Leyte, sa dapit nilang Tiyo,” ni Glenn pa.

“Ruth ayaw ko pasagdi, naingon ko niini karon tungod sa daku nakong gugma nimo,” gigakus ni Glenn si Ruth. Naggaksanay silang duha, naghagkanay.

Tugob sa pagminahalay ang ilang paghinagkanay. Daw susama sila sa managhinigugmaay nga wala magkita og dugay na kaayong katuigan.

Nanginit ang ilang kalawasan ug misaka ang sensasyon sa tagsa-tagsa nila ka kaugalingon. Nabug-os na ang huna-huna ni Glenn nga angkonon niya karon si Ruth.

Nagpanghiram na ang mga kamot ni Glenn sa kalawasan sa dalaga.

Bus-ok pa kaayo ang duha ka daw bulkan sa dughan niini nga sigurado si Glenn nga wala pay laing lalaki nga nakapangahas pagtungas niini.

“Lipaya ko karon Ruth mentras wala pa ko madakpi sa mga polis,” hagawhaw ni Glenn sa iyang hinigugma.

“Sige matuman ang imong gusto, imo na ako karong gabhiona Glenn,” tam-is nga tubag ni Ruth nga misukol na og grabeng hinagkanay ni Glenn.

Gipalingkod ni Glenn sa lantay’ng kawayan si Ruth. Tagsa-tagsa niyang gihukas ang gisul-ob sa dalaga. Si Ruth na ang mihukas sa gisul-ob niyang karsones-maong.

Ang nipis na lang nga hapin sa labing pribadong parte sa lawas ni Ruth ang nahabilin.

Hinay’ng gipahigda ni Glenn si Ruth sa lantay, dayon gidiritso niya pagtapion sa iyang kamot ang nagbugdo nga butang sa tunga-tunga sa duha niini ka mga paa sa dalaga.

Gibalikan niya’g ukob ang mga ngabil sa dalaga dayon padailos ngadto sa nagbugdo nga daw bulkan sa dughan. (Sumpayan pa)