Gula 9
“Good morning, Double-U-Seven,” tingog ni Z ang nabati ni Guieb didto sa pikas tumoy sa linya. “Mora’g nindot gyud tingali ang imong pagkatulog kay dugay ka man kaayong nakatubag?”
“S-Sorry, Sir...”
“No. It’s okey, Double-U-Seven.”
“U-unsay akong ikaalagad nimo, Sir,” ni Guieb pa, “nga sayo ka man kaayong nanawag?”
“Well, nagsusi lang ko sa imong kahimtang,” ni Z pa.
Sa miaging adlaw lang nakagawas si Carlo sa tambalanan human siya diriyot madisgrasya dihang nahulog sa Pasig River ang awto nga iyang gisakyan atol sa iyang pagpakig-engkuwentro sa wala niya hiilhing kaaway.
“Um...okey na ang akong kahimtang, Sir,” ni Carlo pa. “Tingali...diyotay’ng pahulay na lang ang akong gikinahanglan.”
“Maayo hinuon kun mao kana,” ni Z. “Angay kang magpasalamat sa Kahitas-an nga naluwas ka sa tinong kamatayon human niadtong pagkahulog sa imong gisakyan sa suba sa Pasig.”
“Daghang salamat, Sir,” ni Carlo, “sa pahinumdom.”
“Tuod diay, Double-U-Seven,” ni Z nga daw buot motipas og hilisgotan.
“U-unsa, Sir?” Sukit ni Guieb.
‘May nanawag diri sa atong buhatan,” matud ni Z. “Nangita nimo.”
“Unsa?” gisignit sa kahikugang ang sekreta. “K-kinsa man?”
“Nalimot ko’g pangutana sa iyang ngalan,” tubag ni Z. “Mora man gud og nagdali siya. Basta, long distance call kadto.”
“Lalaki ba o babaye?”
“Babaye. Imo kuno siyang ig-agaw.”
“U-unsa?’ si Carlo nga wala’y ideya kun kinsay nanawag kaniya. Daghan siya’g ig-agaw nga babaye busa dili siya makatumbok kun si kinsa kanila ang nanawag didto sa buhatan sa VIDA. Hinuon, nakaseguro siya nga kadtong maong tawo naggikan sa Bohol. “Unsa man kunoy tuyo, Sir?” -- Sumpayan pa