Bibingka nga may pikas ang liki

Nabalaka na karon si Noring, nga hilabihan ka anam ang haon sa gilak-ang niyang linuto nga bibingka. Ambot ba sad nga lahi man sa miaging adlaw, diin langawon na lang siya nga magpaabot sa iyang suking pumapalit sa iyang linutong bibingka.

Nahinumdom na karon siya, kagahapon, diin siya gipasidan-an ni Masyong, nga magpabilin bisan usa na lang ka haon nga bibingka, diin kini nagkanayon.

"Binli lang gayod ako Noring, bisan usa na lang ka haon sa linuto nimong bibingka ugma!"

Apan naunsa ba hinuon, nga wa pa gani mosilang ang adlaw, anam na man kaayo ang iyang mga linuto nga bibingka?

Dili ikalimod, nga sukad nabiyuda si Noring, kang anhing Goyong, nag-inusara nalang siya og tikawtikaw ning iyang pinuy-anan ning ilang dapit sa balangay sa Kalapayan, nga sakop ning ilang lungsod sa San Fernando.

Sa sinugdan, gibati niya ang kahaw-ang ug kamingaw, hangtod nga nakahunahuna na lang siya og pangluto og bibingka, nga sarang makahupay sa iyang kamingaw nga mag-inusara.

Maayo si Masyong, bisan tuod sama kaniya nga usa na usab ka biyudo, kang anhing Eser, magkalingaw man og duaw sa iyang sanggotan, diin matag sayo sa buntag inigmata niya masawod man sa iyang dunggan ang kalanog sa iyang pitlagong.

"Syong, seguro dako gayod kanang imong pitlagong?" ni Noring pa nga mausisahon.

"Mo lang!" mubog tubag ni Masyong.

Gipangulbaan na karon si Noring, nga mikalit lang pagbundak ang ulan. Nagpangilat. May Super bagyo diay nga taliabot.

Takulahaw mi-brownout ang sugang dagitabnon sa VECO, ug mao na lamang ang namatngonan ni Noring, nga hugot kaayo siya nga gigakos ni Masyong.

"Syong, dili gihapon ka mahigawad nga dili ka makatilaw sa linuto kong bibingka!" nagkayuring ang sinultihan ni Noring.

"Aniay laing klase sa bibingka nga akong ipatilaw kanimo!"

Namudlat ang kalimutaw ni Masyong, nga sa may ubos sa bilahan ni Noring, iyang nakita ang klase sa bibingka nga may pikas nga liki.

Wa niya usiki ang laing higayon, diin iyang gipahikap si Noring sa kataas sa iyang pitlagong. Ug unya mibanos ang nagbuy-od nga kahilom. (Kataposan)