Way tuyo sa pagpatay

Nganong homicide may kiha batok nako, Chief? Nga wa man koy intensiyon sa pagpatay ni Byron Espino?" sukot ni Ritche Tibon ngadtong SPO4 Rel Becalas. Nia si Ritche sulod sa selda sa prisohan sa Police Office sa lungsod sa Sibundoy.

Nagbarog siya samtang nag-apod og gunit iyang duha ka kamot og rehas sa trangkado nga selda. Bag-o lang siyang gibalhog sa hepe ning sayong kahaponon. Nisurender siya sa pulis pagkasayod nga dead on arrival sa ospital si Byron human niya sumbaga gawas sa buwangan.

Free lancer nga masyador si Ritche sa buwangan sa ilang lungsod. Di gyud siya mopalta sa buwangan matag adlaw'ng Domingo. Kay daghan siya’g higalang mga puntos. Makakuwarta man siya kun masugoan sa pagmasyar. Ug makalibre sab siya’g inom kun may mag-inom nga daugan sa tari o hantak sa gawas sa buwangan.

Dagsa lang si Ritche sa Sibundoy. Wa pa siyay usa ka tuig dinhi. Way klaro kun taga-diin siya. Kun kinsay iyang mga ginikanan. Kun unsay iyang trabaho. Nagkaamigo lang siya ni Fernando Lapaz nga usa ka mananagat, buwag sa asawa ug may usa ka anak lalaki nga nahibilin niya. Nikuyogkuyog siyang Fernando og panagat, nitabangtabang sa bulohaton sa panimalay sama sa pagkawos og tubig, bugha’g kahoy, pag-lung-ag ug panglimpiyo sa balay. Ang pagpanglaba lang kang Fernando. Ma-Domingo siya manglaba. Kay way hilig sa sugal ug inom, di si Fernando tigkuyog ni Ritche sa buwangan.

Sa barog ug panglihoklihok, tataw nga barumbado si Ritche. Maong giayohan lang siya’g tagad ni Fernando. Daghang nangahadlok sa kabangis ug kabangis og hitsura ni Ritche. Maong giamigo siya sa kadaghanan.

Si Byron dako og kamaisan ug kalubihan sa ilang lungsod. Bugtong siyang anak. Nakapanunod og usa ka hektaryang kamaisan sa iyang amahan. Ug laing usa ka hektaryang kalubihan sa iyang inahan. Iyang asawa nga si Mary Jane, sekretarya sa mayor. May tulo sila ka anak nga puro pa naa sa elementarya. Kay kuwartahan, may pagkahambogero si Byron. Wa siya mahadlok ni Ritche. Tigtambungan sab siya’s buwangan ug hantakan.

Sa wa pa ang hitabo ganihang pasado alas dose sa udto, gikan sa hantakan, niduol si Byron sa pundok nilang Ritche nga nag-inom. Si Ritche ang tigtagay. "Matay'ng buanga! Nawala man akong dos mil pesos! Gikuotan man tingale ko!" bagolbol ni Byron dayong lingkod sa bangko nga gipatong sa palanason nga bato. "Bisa’g iya gyud nang gipildi sa hantak iyang kuwarta! Pawalawala pa gyud!" komedya ang tuno ni Ritche nga namulong samtang nagtunol og basong puno sa beer ngadtong Byron. Nainsultohan si Byron. Gitapi niya ang baso. Nayabo ngadto sa nawong ni Ritche. Sa kalagot ni Ritche, gisumbag niya si Byron og right hook. Maayong pagkaigo sa suwang. Natikay-ang si Byron. Nahulog sa gilingkuran. Unya maayong pagkahagsa sa iyang ulo (ibabaw gamay sa tangkogo) ngadto sa hait nga palanason nga bato. Nikirig siya. Gitabang sa mga kainom ni Ritche. Gidala gilayon sa ospital.

"Sa akong nahibaw-an sa mga subject nako sa Criminology sa estudyante pa ko, manubag gyud ang tawo sa nahitabo sa isig katawo gumikan sa salaod nga iyang nabuhat. Bisag wa pa kay tuyo nga mao na ang mahitabo' sa hepe. Nagduwa sa yawe sa selda sa iyang kamot. "Gisumbag ko ra man siya. Namatay man hinoon" ni Ritche. May pagmahay ang tunada. "Ang imong pagsumbag, salaod na na. Bisag pagbun-og ra untay tuyo nimo. Apan namatay man imong gisumbag, manubag gyud ka’s resulta sa imong salaod" sa hepe. "Pila may piyansa nako, Chief?" ni Ritche. "Mas maayo pa mopiyansa ka.Ug aron makasabot ka pag-ayo sa imong kaso, pangutan-on lang unya ang fiscal" sa hepe. Nilingkod sa iyang lamesa di layo atubangan sa selda. "Ugma ka pa kapiyansa. Kay Domingo man diay ron" dugang niya. (Katapusan) (Aron makalibre og konsulta, dad-a ning pahina sa opisina sa tagsulat. Iatol og Sabado)