Gula 7
Sama kaniya, daw nangita usab og higayon ang kaaway pagluthang kaniya. Naunhan pa gani hinuon si Guieb niini sa pagpabuto. Mihana siya’g tikubo sa atubangan sa manibela dihang nakita niya ang mga bala nga misibaw sa bullet proof nga salamin sa iyang atubangan. Dihang nakahigayon, mibalos siya pagpabuto.
Miliko ang sakyanan sa kaaway habig sa wala pag-abot sa usa ka eskina. Wala gayod malipat si Guieb. Misubay usab siya sa eskina nga gitipasan sa awto nga gisakyan sa kaaway. Apan dihang nakita na niya ang lubot sa sakyanan nga iyang gisundan, girakrakan siya pagpusil sa kaaway luwan niini. Gipaikis-ikis niya ang pagpadagan sa gimanehong sakyanan unya mibalos pagpusil.
Nagpadayon ang ginukdanay sa duha ka sakyanan. Sa matag karon ug unya motublaw ang butobuto sa pikas ug pikas. Si Guieb dili gayod magpautang sa kaaway. Mosukli gayod siya og mga bala sa higayon nga tirahan siya niini.
Gisundan gayod ni Guieb ang gisakyan sa kaaway. Hangtod nga nahiabot sila sa Luneta. Naukay ang katawhan nga nagpalabay sa oras sa plasa nga ilang nalabyan. Nalisang sila sa pinusilay tali sa duha ka tawo nga managsamang nagsakay og awto.
Nagtuyoktuyok sila sa Luneta sa pagginukdanay. Nagpagdayon usab ang ilang pagpinusilay. Wala gayod makahigayon si Guieb sa pagpusil sa ligid sa awto nga gisakyan sa kaaway. Ingon sa nakasabot ang kaaway sa iyang tumong. Gipaikis-ikis niini sa pagpadagan ang awto. Niini, nakadayeg usab sa hilom si Guieb sa kaaway. Migamit usab kini sa utok, niya pa sa hilom.
Gigukod gayod ni Guieb ang kaaway. Nahiagi sila sa atubangan sa City Hall sa Manila. Dili na kaayo trapik niadtong tungora. Ang mga tawo sa city hall nga nahibulong sa kakusog sa ilang pagpadagan igo lang misunod pagtan-aw nila. Unya pagtublaw sa butobuto, nag-iyahay sila pagpanghupo, mao pa masayod o makasabot nga usa diay ka engkuwentro ang nakita nilang pasundayag. -- Sumpayan pa