Ang amahan ug anak

Gikan sa Baguio pauli na sa Manila ang magtiayon nga Kulas ug Miyay ug Victory Liner ang ilang gisakyan. "Ari ta's ikatulong lingkoranan, Miyay, kay may naglingkod na diha sa ikaduha," misugyot si Kulas ngadto sa iyang asawa.

Wala madugay, napuno na ang bus, busa milarga na kini. Sa ilang atubangan, naglingkod ang amahan ug anak nga lalaki nga ang panuigon sa amahan, mga singkuwenta anyos samtang ang anak, mga biyente singko.

"Pa, tan-awa ra god to, kanindot niadto, unsa may tawag ato, Pa?" Kusog kaayo ang pagkasulti sa anak.

"Bisaya man sab diay ning duha," mihunghong si Kulas sa asawa.

"Mao nay gitawag og mga pine trees, Dong," mitubag ang amahan.

"Nindota, Pa, no-kadto, Pa, unsa man sab to?"

"Estatuwa man na ni kanhi Presidente Marcos, Dong."

"Nindota no, mora man sab og tawo, Pa. Unya, hain man ron na si Marcos, Pa, kay gusto nakong makita?"

"Dugay na man nang patay si Marcos, Dong."

Unya, kalit lang nga mi-ulan ug hapit na lang magluksolukso ang anak sa kalipay. "Pa, bugnawa oy," dayong pagawas sa iyang kamot sa bintana, "ingon ba gyud niini ang ulan, Pa?"

"May deperensiya tingali sa utok ang anak," hunghong ni Kulas sa asawa. "Kadako na anang tawo, kun maglihok-lihok ug mosulti sama sa bata nga tulo ka tuig."

"Bitaw," mitubag si Miyay.

Ngitngit na sa dihang miabot sila sa Manila ug nagluksolukso sa kalipay ang anak nga nakakita sa mga maanindot nga mga suga ug makukulay nga mga billboards. Wala makapugong ang magtiayon, ug gipakigsultihan ang amahan.

"Manoy, ayaw lang kini ikasuko, ha, pero ayaw pasagdi ang imong anak nga makalayo kay tingali'g makapanakit."

Medyo nagmug-ot ang nawong sa amahan nga mitubag sa magtiayon. "Dili buang ang akong anak. Buta siya sukad sa iyang pagka-tawo ug human sa daghang operasyon dinhi na lang sa Baguio siya nakakita. Dili niya kapugngan ang kalipay sanglit karon lang niya nakita ang tanan sa iyang palibot."

Wala makakibo si Kulas ug Miyay sa ilang nadungog. Naulaw kaayo sila. "Sorry kaayo, ha," dayon nilang lakaw. (Katapusan)