Gula 6
Miligid si Carlo Guieb sa salog ug unya gilanit ang .45 kalibreng pistola gikan sa iyang hawakan. Wala na siya makadiparal kun hain na si Z. Ang iyang pagtagad didto ra sa nagpungasing mga bala nga nanglusot gikan sa bentana ug sa nangabuslot nga bungbong.
Sa kahimtang nga naghayang sa salog, misantop sa kahimungawong sa sekreta nga dili maayong magpabilin siya sa maong kahimtang. Gidutlan sa mga bala ang sementong bungbong ug hayan mapagan siya sa saag nga mga bala. Dihadiha, sama sa may mga ligid ang iyang bukobuko nga midailos sa salog paingon sa gawas. Wala na siya moagi sa elevator paingon sa ground floor; sa may hagdanan na siya miagi. Nahiabot siya sa main lobby nga naghangos. Nasuta niya nga patay na ang mga guwardiya sa main lobby.
Mikalit pagtindog si Guieb. Apan igmat usab ang kaaway. Nakamatikod tingali kini nga diha na siya sa main lobby ug gipusil na usab siya. Miligidligid si Guieb sa sementong salog aron paglikay sa mga bala nga buot mopugnit kaniya.
Pagtang-on sa butobuto, nadungog ni Carlo Guieb ang andar sa sakyanan nga nagpalayo. Nakasabot gilayon siya sa maong tilimad-on. Midali siya pagtindog ug mipaingon sa nahimutangan sa usa ka sakyanan nga gipanag-iya sa ilang ahensiya. Kadali ra siyang nakaluwan sa awto. Gipaandar niya ang makina niini ug mipahugong sa pagpadagan gukod niadtong sakyanan sa kaaway nga dili pa lang dugay nakabiya.
Hapit na lang palupdon ni Guieb ang kakusog sa pagpadagan sa awto. Ang wala niyang kamot nga naggunit sa armas mao usay nagpugong sa manibela samtang ang tuong kamot maoy nagpahigayon sa pagpangambiyada. Nangita siya’g higayon nga mapusil ang ligid sa awto nga gisakyan sa wala niya hiilhing kaaway. -- Sumpayan pa