Anino sa kulto

GULA 4

Mipahimutang si Carlo sa usa ka silya. Nag-atbang sila si Z.

“Mi-report na ako, Sir, sumala sa imong order,” ni Guieb pa.

“Good,” nagkanayon si Z. “Kodus diay sa imong kalamposan sa pagpuhag sa sindikato sa dakbayan sa Sugbo.”

“Thank you, Sir.”

“Misalig na ako kanimo, Double-U-Seven. Nasayod ko nga molampos ka gayod niadtong maong misyon. Ug karon, may lain na usab nga misyon nga akong isangon kanimo.”

“Unsa man kana, Sir?” Sukit ni Carlo Guieb. Sa iyang hunahuna nakaingon siya nga natagnaan gayod niya ang tuyo ni Z__ nga gipaanhi siya niini sa Manila alang sa lain na usab nga tahas.

“Usa sa atong kauban nga detektib ang gipatay,” miasoy si Z. “Si Double U-Twelve.”

“K-kinsay nagpatay, Sir?” Nagmaukiton si Guieb.

“Still unidentified, Double-U-Seven,” ni Z. “Mao kini ang misyon mo karon -- ang paggukod sa mamumuno nga maoy responsable sa kamatayon ni Double-U-Twelve.”

May idugang pa unta pagsulti ni Z sa dihang ilang nadungog ang lanog kaayong buto didto sa gawas. Naigking sila. Dihadiha midali si Carlo Guieb pagpaingon sa may bentana ug midungaw ngadto sa gawas. Mao dayoy iyang nakita ang ilang guardhouse nga nabungkag ug nag-aso-aso pa. Naigo kini sa usa ka matang sa gamhanan nga bomba. Nagtuo siya nga nangamatay gayod ang mga guwardiya nga nahimutang sa maong guardhouse.

Unya, kalit nga mibagting ang cellphone nga gisulod ni Guieb sa bolsa sa iyang diyaket. Iya kining gihulbot ug gidali pagpaod sa iyang dalunggan.

“Hello?” ni Carlo.

“Kumosta ka na, Mr. Guieb?” Tingog sa usa ka lalaki ang iyang nabati.

Mitingkag ang mga dalunggan ni Carlo Guieb. Namatikdan niya nga miasod ang butokbutok sa iyang dughan. -- Sumpayan pa