Oo, buang ako

Sige pa Fred...” dayong gakos ni Melinda ngadto kang Fred nga mihubo na sa tanan niyang pagbati ngadto sa maanyag nga dalaga.

Kun si Melinda lang ang pabut-on dili na siya gusto nga mamuhi gikan sa paggakos ni Fred hangtod sa hangtod. Gani, nangandoy siya nga dili na moabot ang kabuntagon aron dili na sila magkalagyo pa pag-usab. Alang kang Melinda karon nga ania siya sa usa ka motel uban kang Fred anaa siya sa langit ug paraiso.

Wala makasabot si Melinda kun ngano nga ania man siya magpakabuang sa paghigugma ni Fred nga usa ka dakong minyo! Wala siya makasabot sa kaugalingon kun ngano nga wala gayod siya batia og gugma ngadto kang Romeo nga usa gayod ka ulitawo ug dugay na nga naninguha kaniya.

Kini gud si Romeo walay trabaho. Gasalig lang sa iyang pagka-guwapo. Samtang si Fred gawas nga usa ka professor sa usa ka unibersidad, usa pa gayod ka magsusulat ug mag-aawit. Mao kana nga nahimo siya nga ilado sa katilingban.

Daan nang bilib si Melinda sa pagkamaayo nga motagik og mga pulong ni Fred ilabi na sa mga “for adults only” nga mga sugilanon. Misamot ang iyang pagbilib ni Fred sa diha nga mikanta kini sa iyang kinaham nga mga awit. Mao kana nga wala siya maglangan og panahon sa pagdawat sa gihalad nga gugma ni Fred sa diha nga mitug-an kini sa iyang gitagoang pagbati sa dalaga.

Mao kana nga niining gabhiona karon nagtagbaw sila sa pagdimdim sa matam-is nga dugos sa himaya. Daghan ang mibiaybiay kang Melinda nga nagpakabuang ni Fred. Apan ang tanan nilang pagpanghimaraot kaniya iyang gidawat sa tumang pagkamainiton. Kay matud pa niya kun ang paghigugma ngadto kang Fred usa man ka pagpakabuang dan usa siya ka buang. (Kataposan)