Anino sa kulto

GULA 2

Ang order sa iyang labaw dili kabalibaran. Nagkinahanglan kini og tugbang nga dinaliang responde. Wala nay daghang kutikuti. Sama sa sumbanan nga gitamdan sa mga sundalo: Unahon pagtuman ang trabaho sa dili pa moreklamo.

Mao nga misakay gilayon siya’g ayroplano gikan sa Bohol paingon sa Manila. Pagtugpa sa giluwanang abyon sa NAIA, migawas gilayon siya sa arrival area ug nagpahatod og taksi paingon sa buhatan sa ilang ahensiya sa paniktik. Nakahatag kaniya’g interes ang order sa ilang labaw. May gamay nga tukog sa katahap nga mituhil sa iyang kahimungawong nga tingali mahinungdanon ug dinalian gayod kaayo ang tuyo ni Z kaniya. Unsa kahay nahitabo?

Wala pa unta mapupos ang tagal sa bakasyon nga iyang gipangayo sa ilang labaw human niadtong hugtanay sa bakos niyang pagpakigsambunot sa mga sakop sa malig-ong sindikato nga nagpayuhot og ginadiling drugas sa dakbayan sa Sugbo nga gipangulohan ni Mr. See. Dili tiaw ang kakuyaw ug kalisdanan nga iyang gisagubang una niya napuhag ang maong pundok sa daotang elemento nga mao usay utok sa kamatayon sa iyang igsoon. Mao nga buot pa unta siyang magparelaks sa iyang kaugalingon. Apan kay gimahal niya ang iyang trabaho, mibalik na lang siya sa Manila og dili oras gumikan sa order ni Z kaniya. Wala gani siya makapananghid ni Lexie, ang iyang hinigugma sa dakbayan sa Sugbo. Buot niyang masayran ang suliran sa ilang labaw nga wala ikasulti niini kaniya sa telepono.

Nagtuo si Guieb nga dili yanong suliran ang giatubang ni Z. Suheto siya sa kinaiya niini. Dili kini mosangpit kaniya kun dili bug-at ang problema nga atubangon niini. Mao nga nakapangagpas siya nga mahinungdanon gayod kaayo ang tuyo niini kaniya, confidential kay wala man isulti niini kaniya sa ilang panaghinabi sa long distance. Kaha dili gusto si Z nga may laing masayod sa ilang panagsultihan. Sekreto gayod kaayo. -- Sumpayan pa