Mas isog pa sa leon

Sibat na lang, Manoy. Wa man gyud kay labut ini. Naangin man lang noon ka!" ni Efren Larrobis ngadto's iyang maguwang nga si Allan.

Naglingkod si Efren karong buntaga sa lantay'ng kawayan sa pantawan sa ilang balay sa Tawason. Si Allan nagbarog sa may pultahan. Bag-o lang siyang nisaka. Nagpakitaay sila’s ilang tagsatagsa ka kopya sa Resolution gikan ni Fiscal Teddylyn Reyes.

Gideklarar sa maong resolusyon nga dunay igong basihan nga taralon sila sa hukmanan sa kasong pagpanglugos. Sila rang duha managsoon. Ilang mga ginikanan sayong nangadto sa merkado sa Canduman. Nag-atiman sa ilang tindahan.

Daw di makatuo si Allan sa maong resolusyon. Apan naa na man gyud na. Nakapanglantaw siya sa halayong kabungtoran sa Tawason. Daw nahugno ang kalibutan ug nidat-ug niya. Minyo na siya. Gaedad og 21. May anak usa. Nagtrabaho sa Maritrans Forwarders isip freightclerk. Nag-abang siya’g balay sa Pagsabungan duol sa iyang trabahoan.

Si Efren, 15 anyos ang edad. Nagtungha sa Canduman National High School, Third year pa siya. Ipon pa’s ilang mga ginikanan nga sila si Fernando ug Marivel. Sa katorse pa iyang edad, duna silay housemaid nga batan-on. Si Norelyn Rosaldo, 17 ang edad. Usa ka gabii, gikamang ni Efren si Norelyn. Hangtud nga hapit kada gabii na sila magdog.

Pagkamabdos ni Norelyn, nipauli sa ila sa lungsod sa Sibundoy. Dihang nadiskubrehan sa mga ginikanan iyang kahimtang, nisumbong sila’s kapolisan sa ilang lungsod. Nikiha si Norelyn og rape batok kang Efren. Kay 15 anyos man si Efren (dili mapriso sumala sa bag-ong balaod nga giisponsoran ni Senador Kiko Pangilinan) gisulsulan sila’s pulis nga ipakiha’g apil si Allan.

Nipirma’g affidavit si Norelyn nga apil sab og lugos niya si Allan. Kini laging kasong rape, sayon tagikon, lisod pagdepensa, nitoo ang fiscal sa alegasyon ni Norelyn. Bisag namahayag si Allan sa iyang counter affidavit nga wa na siya’y uli-uli sa Tawason kay minyo na siya ug naglain nag puyo. Mismo si Efren, sa iyang affidavit, niangkon nga siya ray nakighilawas ni Norelyn. Ug giangkon niya ang bata nga gisabak ni Norelyn. Wa siya tohui sa fiscal.

"Tungod sa balaod nga yabag, daghang nayabag," ni Allan. Malagoton. "Sige na Manoy. Sibat na! Samtang may panahon pa. Sabado ron. Basig sa Lunes malutsan na ta’g Warrant of Arrest. Wa ra ba tay ikapiyansa. Ako, way kaso nako. Kay ako man ning um-umon ang tanan," ni Efren nga nabalaka kaayo sa kahimtang sa iyang maguwang.

"Kun mosibat ko, asa man ko padulong? Wa man tay paryente sa laing isla o probinsiya. Gawas pa, magutman akong pamilya" ni Allan nga nagping-it. "Kun di ka mosibat, mapriso ka uban nako. Maayo man kong mapriso kay sad-an man. Ikaw maoy pait, kay wa gani ka kakita anang Norelyn!'' ni Efren. Namundak sa iyang tiil sa sawog nga kawayan.

"Magtoo man sab ang mga pulis ug mga abogado nga ikaw ray gipaangkon kay di man ka mapriso" ni Allan. "Mao nay nakaparat natong mga Pilipino nga hilig sa pangopya. Way originality. Kay may balaod sa America nga ang 15 anyos di mapriso, kopya sab dayon atong brayit nga senador. Sa wa pa nang balaora, ubos sa nuybe anyos maoy di mapriso. Kanang balaora, imbis nga sa kamoderno na’s atong mga kahimanan, matured na’g panghunahuna ang mga batan-on, nilutaw hinoon nga nagkatiguwang ang bata, nagkabugo o nagkaabno. Ang kinse anyos nahibawo na’g unsay maayo og unsay dautan. Nganong di man prisohon?" ni Efren.

"Sa gikaingon ko na, tungod sa balaod nga yabag, daghang nangayabag. Hasta pulis!" ni Allan. "Unsa pa may imong gihuwat? Sibat na!" ni Efren. "Nakahukom kong di ko mosibat. Atubangon nako ang kaso. Limpiyuhon nako akong ngan. Kay matud pa sa akong higala nga law student. “Ang sad-an modagan bisag way naggukod. Apan ang inosente, mas isog pa sa leon" ni Allan. "Unsay gipasabot ana?" ni Efren. "Proverb na gikan sa Bibliya. Gisitar kuno sa Corte Suprema. Nagpasabot nga kun mosibat ang akusado, sad-an. Busa, di ko mosibat" ni Allan.

"Ikaw god!" ni Efren. Namid-ok. "Maghuwat na lang ko’g dakpon sa among balay" ni Allan dayong kanaug. Nakapanglingo si Efren nga nisunod og tan-aw sa maguwang nanaug. (Aron makalibre og konsulta, dad-a ning pahina sa opisina sa tagsulat. Iatol og Sabado)