Walay kamatayon ang gugma

Gula 110

Dihang ablihan na unta niya ang pultahan sa walang kilid sa awto, may duha ka tawo nga kalit miduol kaniya. Ang usa naggunit og balisong ug ang lain naggunit og pistola nga pulos gition ngadto kaniya. Mideklarar ang duha og hold-ap.

Milugnot siya dihang buot ilogon sa usa ka lalaki ang dala niyang shoulder bag. Apan nagunitan gayod siya sa maong lalaki.

“Buhii siya!”

Dihay tingog sa usa ka lalaki nga nakapalingi sa duha ka hold-aper. Si Randy. Gidasmagan gilayon niini ang duha ka hold-aper.

Natikay-ang ang usa ka hold-aper-- ang nagbitbit og balisong --nga naigo sa flying kick ni Randy. Apan nakapabuto sa armas ang kauban niini.

“Randddyyy....” Nakasiyagit si Jody sa kalisang dungan sa pagkatumba ni Randy.

Tapsing ra ang samad ni Randy. Layo ra sa patyanan. Diha si Jody sa kiliran niini sa dihang nabalikan na kini sa panimuot.

“Tua na sa morgue ang tulisan nga nagpusil nimo,” ni Jody pa. “Napatay siya sa among guwardiya.”

Wala motingog si Randy. Mipitokpitok lang ang mga mata niini. -- Taposon sunod gula