Walay kamatayon ang gugma

Gula 109

Mihinay siya paghigda tupad sa bata. Mihayang siya ug gikipatkipat ang mga mata nga gipunting sa kisame. Takulahaw lang, nanumbalay sa iyang hunahuna si Randy. Oo, si Randy.

Gipamalandongan na niya sa makadaghan ang bahin sa pagpangulitawo og balik ni Randy kaniya. Iyang nasuta nga may luna pa gihapon si Randy kaniya. Iyang nasuta nga may luna pa gihapon si Randy sa iyang kasingkasing. Apan kun mahinumdom gani siya sa kamiserable sa iyang kinabuhi kaniadto diin kini ang iyang gibasol nga maoy nakaingon sa iyang pagka-alaot, mawagtang ang tanan niyang kaluoy ngadto niini.

Mao nga dili na siya magpahigot pag-usab sa gugma. Itingob na lang niya ang iyang panahon sa pag-atiman kang Lovi ug sa mga negosyo nga gibilin ni Mr. Enrique Salvador kaniya.

Paggawas ni Jody sa iyang buhatan, nagdali siya pagpaingon sa nahimutangan sa iyang awto nga bag-o lang niyang napalit. Napugos na gayod siya’g palit og sakyanan tungod kay sa kadaghan sa negosyo nga iyang giatiman karon, langan na kaayo ang pagsige’g commute. Mao nga gibuntog na gyud niya ang iyang pagkakulhanon sa pagmaneho. -- Sumpayan pa