Walay kamatayon ang gugma

Si Jody wala na lung-i ni Randy. Kanunay kining mobisita sa iyang gipuy-an. May mga higayon nga adto kini mobisita sa iyang buhatan. Usahay manawag sa telepono. Usa ray tuyo ni Randy, ang paghangyo kang Jody nga ipadayon nila ang ilang gugma.

Hugot nga nagdumili si Jody. Apan bisan giunsa niya’g dispatsar si Randy, nagpadayon gihapon kini sa pagpaninguha kaniya.

“Wa ka na ba gyod diay mahigugma kanako, Jody?” Nangutana si Randy usa ka higayon niana nga namisita ang lalaki sa iyang gipuy-an.

Nakahigayon sila’g panagsultihanay og dugay-dugay kay natulog na man si Lovi, ang anak ni Jody kang Mr. Enrique Salvador. Gawas sa bata nga natulog sila rang duha sa balay kay wala man mokuha si Jody ug katabang. Naanad siya sukad pa sa didto pa siya sa poder sa iyang amahan ug hangtod sa naminyo na siya kang Mr. Salvador nga wala sila’y sulugoon sa panimalay. Sila ray mangunay paghimo sa mga buluhaton sa panimalay. Makatapol kuno kun magsalig sa sulugoon, nila pa.

“Ayaw ko’g pangutan-a niana, Randy,” ni Jody pa. “Sukta hinuon ang imong kaugalingon kun angay ko pa ba ikaw’ng higugmaon. -- Sumpayan pa