GULA 101
“N-no,” ni Randy nga daw dili makatuo.
“Mao kana ang tinuod, Mr. Maglana. Ingon niana ang dagan sa ligid sa kinabuhi. Kaniadto kamo ang naibabaw. Karon kamo na usab ang nailawom.”
Wala makatingog si Randy. Namatikdan ni Jody nga nanglipaghong kini sa iyang atubangan. Napihaw usab ang nawong ni Megan dihang iya kining gitutokan.
“Dako na kaayo mo’g utang sa UCV Holdings,” gikan na usab ni Jody. “Taas na ang kutay sa panahon nga gilugway ko kaninyo. Karon panahon na nga maningil ko.”
“M-may ihangyo unta mi nimo, Jody,” mapanagan-ong namulong si Randy. “Nga kun mahimo...”
“Kun wa kamoy ikabayad,” salo ni Jody sa gisulti ni Randy. “Mapugos ako sa pagbira sa inyong mga propiyedad.”
Wala makatingog si Randy. Ingon kini sa nahisagmuyo sa iyang atubangan. Nasayod siyang naapiki kini sa gihatag niyang mga kondisyon.
“Hatagan ko kamo’g usa ka semana sa paghunahuna niining mga butanga,” ni Jody pa. “Taas na gani kanang maong higayon. Pero dili pa ko tantong tig-a og balatian maong naluoy pa gihapon ko ninyo. Apan human sa usa ka semana nga dili gihapon kamo makabayad, mohimo na ko’g legal actions batok ninyo. Ug nasayod na kamo sa sunod nga mahitabo.” -- Sumpayan pa