Nakamata sa grabeng kasaba si Renante gikan sa iyang mga ig-agaw ug ubang kaparyentehan nga halos dili makatoo nga diha ra siya ilawom sa lantay natulog atol sa duha ka adlaw niyang pagkahanaw. Apan gitug-anan ni Renante si Agaw niya Peping kun diin siya atol sa iyang pagkahanaw. “Mao kana Gaw, gusto sa engkantada nga adto na lang ko mopuyo sa ilang gingharian.”
“Sus ayaw g’yud tawon Gaw kay dili ka na mabalik,” matud ni Peping. Gitug-anan diay ni Peping ang uban nilang mga paryente sa gitug-an kaniya ni Renante mao nga gihugopan si Renante sa iyang mga iyaan ug ubang katiguwangan. Dunay nanagdala og mga kandila, mga kamanyan ug ubang mga dahon ug gamot sa kahoy nga kuno palina aron dili na makaduol ang engkanto kang Renante.
Pagkaudtong tutok, dunay mga tiguwang nga nangadto sa pangpang nga giingong gingharian sa mga engkanto ug mihangyo nga dili lang nila kuhaon si Renante.
Gitambagan si Renante sa iyang mga ig-agaw ug mga iyaan nga mopauli na lang sa syudad. Apan dihang si Renante dinhi na sa dakbayan, wala gayud malaksi sa iyang kaisipan si Dorin.
Tibuok gabii hangtud nabuntag na lang nga si Renante nag-alindasay ug naghanduraw sa engkantada nga sa hamubo nga higayon iyang nahimamat ug natilawan ang dugam-is.
Pagkaugma sa buntag, may nakita si Renante nga tahum kaayo nga kaba-kaba nga diha sulod sa iyang kwarto, apan takulahaw lang usab nga milupad gawas sa bentana dihang iya na unta nga dakpon. Nanglabay ang mga adlaw nga wala gayud mahimutang si Renante. Nakahukom na siya nga mobalik sa Giloctog, Barili. Kilum-kilom na usab siya nga miabot didto. Duol na siya niadtong payag diin sila si Dorin namasilong. Gisud-ong niya kini ug dayon huyhoy ang abaga nga miduol. Milingkod siya ug gihandum ang nahitabo kanila ni Dorin.
Taud-taud, mibiya si Renante sa payag ug mipadayon paglakaw. Duol na siya niadtong pangpang nga giingong gingharian sa mga engkanto. Wala siya makapugong, misinggit siya. “Dorin! Dorin! Pakita nako, dia na ako Dorin!”
Walay Dorin nga nagpakita kaniya. Midiritso siya sa balay sa iyang Lola ug ang iyang mga ig-agaw nakalitan sa iyang pag-abut. Human sila makapanihapon, nagpahayahay si Renante sa gawas sa balay dihang nakita niya nga may awto nga mihunong. Mibukas ang pultahan ug nanaug si Dorin. “Tana Ren, adto na ta sa among gingharian. Salamat kaayo sa imong pagbalik,” matud ni Dorin. Abtik tuod nga misakay si Renante sa awto.
“Salamat kaayo nga mibalik ka Ren. Gikan karon, ikaw na ang ilhon nga prinsipe dinhi ning maong gingharian,” ni Dorin pa.
“Mga sakop mao kini si Renante ang bag-o ninyo nga prinsipe,” pagkahuman og litok ni Dorin sa maong mga pulong nakita ni Renante ang daghang mga tawo nga diha ra diay sa ilang palibot. -- Kataposan