Gula 6
Human sa ilang kumbati sa kama, dali nga nag-ilis sa ilang sapot sila si Renante ug Dorin. Dayon nanggawas sila sa kwarto ug mipaingon sila niadtong tanaman nga nag-umbaw sa bungtod.
Nanglingkod sila niadtong nag-igdal nga dakung bato punoan sa dakung kahoy. Giliraw ni Renante ang iyang panan-aw apan dili gayud niya kabisado ang maong lugar nga iyang nahimutangan.
“Nasayud ko nga duna kay ipangutana kanako Ren,” buotan ug paraygon kaayo ang tuno sa tingog ni Dorin.
Wala dayon motingog si Renante kay naglibog siya unsaon pagsugod ang iyang mga pangutana ngadto kang Dorin.
“Dorin, una nakong pangutana, hain man g’yud ko karon mahimutang? Gikan sa balay nila ni Lola nga nahimutang kilid sa bukid, nanakay kita og awto paingon dinhi ug kadali ra ang dagan, sa ato pa duol ra kining lugara.”
“Ikaduha nako nga pangutana Dorin nganong duna may awto nga bukid man kining daku, maglisud man gani ang habal-habal pag-agi sa gamay’ng dalan-dalan?,” sunod-sunod ang pangutana ni Renante.
Gitagsa-tagsa siya pagtubag sa dalaga. May gisangpit si Dorin ug giingnan nga magpadala sila og mainom ug makaon, apan walay nakitang laing tawo si Renante sa ilang nahimutangan. Nahalingi-lingi siya sa palibut.
Taud-taud, diha nay duha ka baso nga puno sa juice ug mga makaon ibabaw sa bato nga naporma og lamesa. Wala makakita si Renante kun kinsa ang nagbutang mao nga misamot kalibog ang iyang ulo.
“Ayaw na liboga ang imong utok sa paghuna-huna Ren. Dia ka karon sa gingharian sa mga engkanto,” hinay nga pagpasabot ni Dorin. “Halos milurat ang mga mata ni Renante sa kakulba.
Nakadungog na siya sa mga tabi-tabi kaniadto sa iyang mga iyaan nga dunay mga katingad-an sa ilang lugar ug nagtoo sila nga duna g’yoy mga engkanto nga nagpuyo.
“Sa ato pa, usa ikaw ka engkanto Dorin?” gisukna ni Renante ang dalaga. “Oo wala ka masayop. Usa ako ka engkantada ug ania ka karon sa among gingharian, apan ayaw lang kahadlok Ren.”
“Mao ba. Apan nganong gitugyan mo man kanako sa hilabihang kasayon ang imong pagka-babaye Dorin. Dili ba may gahum man kamong mga engkanto?” matud sa ulitawo.
“Tinuod kana Ren may super-natural power kaming mga engkanto, apan gituyo ko kadto nga mipasilong kunohay ko sa payag aron paghatag og agianan nga magkahimamat kita. Mga bata pa kita nga nakagusto na ko nimo kaniadto dihang manirador kamo og ang imong mga ig-agaw sa kilid sa among balay,” ni Dorin pa. (Sumpayan pa)